Ministru Obras Públikas Salvador Soares dos Reis Pires. Imagen/Egas Cristovao

VENILALE, 09 agostu  2019 (TATOLI)-Ministru Obra Públika (MOP), Salvadór Eugénio Soares dos Reis Pires, husu ba autoridade lokál, komunidade, veteranu no joven sira iha munisípiu Baukau no Vikeke ne’ebé hela besik estrada ibun atu kolabora no servisu hamutuk ho ekipa husi Ministériu Justisa  no Unidade Jestaun Projetu (PMU) husi MOP bainhira halo levantamentu dadus ba abitante afetadu ba konstrusaun estrada Baukau-Vikeke.

“Ita tau rekizitu husi konstrusaun ne’e mak indemnizasaun ba propriedade privada husi populasaun ne’ebé hela iha trosu dalan ninin, hanesan ai-oan, ai-horis ho kios oan sira,” Ministru Salvador afirma iha postu administrativu Venilale, ohin.

“Ne’e ita-nia ekipa sei servisu ho Ministériu Justisa (MJ) atu halo levantamentu depois fó indemnizasaun”, katak.

Polítika Governu Konstitusionál Daualuk (VIII) nian atu hametin konetividade entre munisípiu ho munisípiu, ba área rurál liuliu área produtivu sira.

Xefe Suku Fatulia, Postu Adminisitrativu Venilale, Munisípiu Baukau, Angelino Moises Perreira, dehan komunidade lubuk ida iha Venilale afeta ba konstrusaun estrada ne’e.

“Ita  tenke halo sosializasaun atu fó indemnizasaun ba komunidade afetada sira atu sira mós sente sai na’in ba konstrusaun ne’e rasik”, nia sujere.

Xefe Suku Ossu de Cima, Postu Administrativu  Vikeke Vila, Munisípiu Vikeke, Celestino Monteiro de Carvalho, dehan populasaun suku Ossu kontente no agradese ba Oitavu Governu tanba halo duni estrada hodi benefisia sira.

“Ami husu kompañia ne’ebé kaer obra ne’e atu fó subsídiu ba komunidade ne’ebé afetadu husi konstrusaun estrada ne’e rasik”, katak nia.

Tanba ne’e, nia dehan xefe suku 36 iha munisípiu Vikeke hahú tuur hamutuk ona ho autoridade Munisípiu Vikeke atubele halo aproximasaun ho populasaun sira atu kontribui ba konstrusaun estrada ne’e.

Konstrusaun estrada nasionál trosu Baukau-Venilale no Venilale-Vikeke ne’e ho distánsia Kilómetru 58-resin, ho orsamentu dólar amerikanu millaun 44, fundu empréstimu husi Banku Dezenvolvimentu Aziátiku (ADB) ho durasaun tinan tolu hahú husi agostu 2019 to’o fevereiru 2022.

Notísia relevante : MOP Husu Abitante Baukau-Vikeke Asegura Konstrusaun Estrada

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here