Vise Ministru Edukasaun Juventude no Desportu, João Zacarias.

DILI, 10 setembru 2019 (TATOLI)—Ministériu Edukasaun, Juventude no Desportu (MEJD) kontinua implementa programa merenda eskolár ba iha territóriu Timor-Leste maibé tinan ne’e liuhusi Dirasaun Nasionál Asuntu Sosiál Eskolár (DNASE) sei fornese uluk foos-rai saka 8.000 ba eskola sira iha Munisípiu lima (5) ne’ebé preparadu ona.

Munisípiu lima ne’ebé preparadu ona atu simu apoiu refere mak Munisípiu Manufahi, Baucau, Manatuto, Lautem no Aileu.

“Sira preparadu ona tanba iha orsamentu rasik hodi halo transportasaun husi Munisípiu ba eskola sira ne’ebé atu hetan apoiu foos sira ne’e,” dehan Vise-Ministru Edukasaun Juventude no Desportu (MEJD), João Zacarias, ba jornalista sira iha ninia serbisu fatin MEJD, Vila Verde, Dili, tersa (10/09/2019).

Nia hatutan, polítika ida ne’e DNASE halo tanba to’o agora dirasaun laiha osan atu halo distribuisaun ne’e duni dirasaun husi ba munisípiu sira atu fasilita ho orsamentu rasik hodi kontinua transporta fali foos sira ne’e eskola sira.

Purtantu, nia dehan, munisípiu lima mak iha ona posiblidade ne’e duni dirasaun prepara ona proposta hodi haruka ba Sentru Lojístika Nasionál (CLN-sigla portugés) atu prepara mós foos sira ne’ebé dirasaun nasionál husu.

Nune’e mós, nia informa, DNASE haruka ona karta ba Finansa, Ministériu Edukasaun nian atu prepara mós orsamentu ba karregamentu no deskaregamentu ho montante osan $.6 mil. Tanba ne’e dirasaun hein de’it kuandu osan sai ona sei transporta ona ba munisípiu lima refere.

“Foos sira ne’e ami sei apoiu ba munisípiu lima ne’e hahú husi fulan setembru to’o de’it novembru 2019,” nia dehan.

Notísia relevante:Eskola Katólika La Hetan Merenda Eskolár Tanba Iha Orsamentu Rasik

Jornalista : Tomé Amado

Editór        : Rafy Belo

HAKEREK NO HATÁN

Please enter your comment!
Please enter your name here