Foto espesiál

DILI, 01 agostu 2019 (TATOLI)- Programa merenda eskolár ne’ebé Ministeriu Edukasaun kria hodi ajuda alunus iha eskola publika no privada tanba hakarak tulun estudante sira ne’e atu aproveita prosesu aprendijazen ho di´ak maibé úniku estudante eskola katóliku sira ne’e mak la hetan apoiu merenda eskolár tanba sira iha orsamentu rasik.

Diretór Nasionál Asaun Sosiál Eskolár (DNASE), Belchior M.A Barros Gueira hateten, durante ne’e Governu apoiu de’it merenda eskolár ba eskola públiku no privadu ne’ebé komunidade sira mak harii. Maibé, eskola katóliku ne’ebé misaun nian, la hetan apoiu merenda eskolár tanba sira iha fundus rasik.

Nia esplika katak eskola katóliku iha ninia fundus rasik ne’e tanba hetan apoiu direita husi Gabinete Primeiru Ministru (GPM) nian tanba ne’e mak Ministeriu Edukasaun la tau prioridade apoiu merenda eskolár ba eskola refere.

“Orsamentu ne’ebé mak eskola katóliku sira hetan ne’e, sira rasik mak sei jere tanba relatóriu sira halo ne’e direitamente sei hato’o ba GPM nian. Tan ne’e, Ministériu Edukasaun sei fokus de’it ba eskola sira seluk ne’ebé toma konta Ministériu Edukasaun nian,” dehan DNASE, Belchior M.A Barros Gueira ba jornalista sira iha ninia kna´ar fatin Ministériu Edukasaun, Vila Verde, ohin

Tuir DNASE, ME prepara ona fós produtu lokál (fós rai) rihun 14 sakas no  fulan ida ne’e sei fornese ba eskola iha Munisípiu lima inklui  Baucau Maliana, Ermera Manatutu no Same (Maunfahe). Fós sira ne’e ME hetan apoiu husi CLN (Sentru Lojístika Nasionál-sigla portugés) hodi promove nafatin produtu rai laran.

Nia hateten, eskola munisípiu lima ne’ebé fulan ne’e sei simu fós produtu lokál ne’e tanba prienxe ona kritériu ne’ebé mak ME husu tanba transportasaun fós husi nasionál ba munisípiu lima ne’e reponsabilidade governu sentrál nian maibé kuandu iha ona munisípiu atu transporta fali ba eskola sira ne’e responsabilidade munisípiu sira nian.

“Tan ne’e mak ita husu ona ba munisípiu sira kona-ba orsamentu transportasaun sira mak responsabiliza maibé munisípiu lima prontu ona tanba sira ninia orsamentu sufisiente hela atu transpotsa fós ba eskola sira no munisípiu sira seluk to’o agora ita seidauk rona informasaun,” nia informa.

Entertantu, totál eskola ne’ebé mak ME rezista ona hodi hetan apoiu merenda eskolár ne’e hamutuk rihun ida resin no durante ne’e fornesementu fós no ai-han sira seluk hodi apoiu estudante sira iha merenda eskolár ne’e la iha problema.

Notísia relevante: http://www.tatoli.tl/2019/07/12/inan-aman-tenke-kontrola-menu-merenda-eskolar/

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here