Ministru Obra Públika, Salvador Soares dos Reis Pires. Imajen/TATOLI.

DILI, 09 setembru 2019 (TATOLI) – Ministru Obra Públika, Salvador Eugénio Soares dos Reis Pires, hatete kompañia 48 ne’ebé Governu kontrata atu konstrui estrada rurál ne’e iha ona faze mobilizasaun materiál.

“Ita-nia kompañia sira halo mobilizasaun materiál ba terrenu. Ha’u hanoin katak sira tenke halo ona mobilizasaun tanba sira iha ona kontratu atu halo ezekusaun obra ne’e ba tinan ida nian”, Ministru Salvador informa iha edifísiu Ministériu Finansa, Aitarak-Laran, ohin.

Iha faze mobilizasaun, Ministru Salvadór dehan husi Governu asina kontratu ho kompañia sira iha loron 90 atu hala’o preparasaun no mobiliza materiál atu ezekuta obra iha terrenu.

Kontratu ne’e Governu asina ho empreza 48 iha 2 agostu foin lalais ne’e hodi konstrui estrada rurál ho pakote 48 iha territóriu.

Nune’e ministru husu nafatin ba kompañia sira ne’ebé manán konkursu tenke kontinua hatudu kapasidade no kompromisu ne’ebé sira kompromete ona atu ezekuta obra ne’e tuir kontratu.

“Ita husu kompañia sira atu iha fulan oin hahú konstrui ona estrada rurál sira tuir tempu iha kontratu ho kualidade, tanba ita sei la halo pagamentu kuandu laiha kualidade”, katak.

Diretora Kompañia Nautetu.12 Lda, Maria de Fátima Imaculada Correia, dehan hahú halo ona mobilizasaun materiál ba terrenu atu konstrui estrada rurál husi Hera to’o Remexiu ho kilómetru 10-resin ho kustu orsamentu rihun $493.

“Ami asina kontratu ho Governu hotu ona, maibé atu halo implementasaun tenke loron 90 mak foin bele implementa, ne’ebé agora ami tama ona faze mobilizasaun”, nia informa via telefone.

Diretora ne’e promete sei hala’o konstrusaun estrada rurál ne’e ho kualidade tuir padraun Governu Timor-Leste nian.

Ministériu Obra Públiku (MOP) asina kontratu ho kontraktor 48 hodi konstrui estrada rurál ho pakote 48 liuhusi asisténsia tékniku International Labour Organization (ILO) iha munisípiu 12 ho kustu orsamentu millaun $15 ho durasaun konstrusaun tinan ida.

Kontraktor 48 ne’e, liuhusi konkursu públiku Komisaun Nasionál Aprovizionamentu (CNA, sigla portugés) ne’ebé rigorozu, liuliu haree ba kapasidade téknika kada empreza nian no tempu ba konstrusaun tinan ida.

Ekipa supervizaun kuaze enjeñeiru na’in-50 hamutuk ho ekipa ILO atu kontrola konstrusaun pakote 48 iha 12 munisípiu.

Iha 2019, Governu Timor-Leste asina ona ho parseiru dezenvolvimentu liuhusi Governu Austrália apoiu dólar Austrália millaun 25 ba finansia asisténsia téknika liuhusi ILO.

Governu Timor Leste kompromete kada tinan tau orsamentu millaun $21 atu konstrui estrada rurál iha territóriu Timor-Leste hodi atinje trajetu kilómetru kuaze 400 to’o 500.

 Notísia relevante : MOP Asina Kontratu ho Kontraktor 48 Konstrui Estrada Rurál

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here