Ministru Obra Publiku Salavador Eugénio Soares dos Reis Pires asina kontratu ho kompañia sira hodi konstrusaun estrada rurál. Imajen/Florencio Miranda Ximenes.

DILI, 02 agostu 2019 (TATOLI)-Ministériu Obra Públika (MOP) asina ona kontratu ho kontraktor 48 hodi konstrui estrada rurál  ho pakote 48 iha territóriu Timor-Leste iha 2019.

Konstrusaun estrada ne’e sei liuhusi asisténsia téknika International Labour Organization (ILO).

“Ami asina kontratu ho kontraktor 48 ba konstrui estrada rurál ho projetu pakote 48 iha territóriu Timor-Leste ho kustu orsamentu millaun $15 ho durasaun konstrusaun tinan ida”, Ministru Obra Públika Salvadór Eugénio Soares dos Reis Pires, ba jornalista sira iha Novo Turismo, Lecidere, ohin.

Kontraktor 48 ne’e, Ministru Salvadór dehan liuhusi konkursu públiku Komisaun Nasionál Aprovizionamentu (CNA, sigla portugés) ne’ebé rigorozu, liuliu haree ba kapasidade tékniku kada kompañia nian no tempu ba konstrusaun tinan ida.

“Ita asina ona kontratu ne’ebé sira (kontraktor) bele halo mobilizasaun atu hahú konstrusaun ona,” katak.

Ministru Salvador dehan vizaun Oitavu Governu, atu hametin konetividade infrastrutura fízika entre área rurál ho postu administrativu no munisípiu inklui nasionál atu garante povu bele asesu estrada.

Tanba ne’e, MOP husu ba kontraktor sira atu konstrui no reabilita estrada rurál ho kualidade hodi bele kontribui ba prosesu dezenvolvimentu nasionál.

“Ha’u husu ita-boot sira-nia seriedade atu uza kapasidade tékniku sira hodi garante kualidade ba projetu sira ne’e”.

Nia dehan ekipa supervizaun kuaze enjeñeiru na’in-50 hamutuk ho ekipa ILO atu kontrola konstrusaun pakote 48 iha 12 munisípiu.

“Laiha kualidade ita la selu, Governu só halo pagamentu bainhira ekipa tékniku halo supervizaun katak obra iha kualidade”,MOP fó hanoin.

Ministru Salvador akresenta Oitavu Governu liuhusi liña ministeriál iha 2019 prevene ona millaun $15-resin ba estrada rurál ho pakote 48 no ba faze daruak pakote 18 liuhusi orsamentu fundu infrastrutura.

Iha 2019, Governu Timor-Leste asina ona ho parseiru dezenvolvimentu liuhusi Governu Austrália apoiu dólar Austrália millaun 25 ba finansia asisténsia tékniku liuhusi ILO.

Governu Timor-Leste kompromete kada tinan tau orsamentu millaun $21 atu konstrui estrada rurál iha territóriu Timor-Leste hodi atinje trajetu kada tinan atinje kilómetru kuaze 400 to’o 500.

Iha fatin hanesan, Diretora Kompañia Nautetu.12 Lda, Maria de Fátima Imaculada Correia promete sei hala’o konstrusaun estrada rurál ne’e ho kualidade tuir padraun Governu Timor-Leste nia.

“Ha’u halo konstrusaun estrada rurál husi Hera to’o Remexio ho kilómetru kuaze 10-resin ho kustu orsamentu rihun $493. Ha’u promete asegura kualidade,” diretora kompañia ne’e garante.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here