DILI (TATOLI)—Sekretáriu Estadu Konsellu Ministru no Komunikasaun Sosiál (SEKMKS), Matias Boavida, konsidera lian Portugés importante tebes ba Jornalista Timor, hanesan  portavós públiku nian.

Boavida espera iha loron ruma Jornalista Timoroan hotu bele hakerek notísia ho lian Portugés nu’udar lian ofisial ida ba Timor, hodi afirma identidade timoroan iha rejiaun aziátiku.

“Programa konsultoria lian portugés importante tebes atu melorá koñesimentu jornalista sira iha dalen portugés, nune’e jornalista sira bele hakerek notísia ho lian ofisiál ne’e ho di’ak,” Matias Boavida ba Ajénsia Tatoli hafoin partisipa serimónia fahe sertifikadu formadu kursu lian Portugés iha Palásiu Governu, ohin.

Lian Portugés tuir Boavida nia haree sai hanesan identidade Timor nian iha rejiaun aziátiku. Tanba ne’e, jornalista Timor, importante liu hatene lia refere. Aproveita Kooperasaun entre Governu Timor-Leste ho Institutu Camoes atu aperfeisoa koñesimentu no domíniu lingua Portugés.

“Ha’u apresia tebes ba kooperasaun tanba bele kapasita jornalista sira atu bele melora Portugés hodi tau ba prátika iha servisu professional jornalista nian.”

“Espera katak governu foun ne’ebé mai bele kontinua no tau iha konsiderasaun ba projetu konsultoria lian Portugés,” nia dehan.

Parte seluk, Embaixadór Portugal iha Timor-Leste, José Pedro Machado Vieira afirma ba formasaun dalen Portugés ba jornalista importante tanba bele melora kapasidade jornalista sira oinsá mak hakerek notísia Portugés ho di’ak liu tan.

Sertifikadu ne’e fahe hosi konsultoria lingua Portugés ba formadu Jornalista timoroan ho nivel báziku hamutuk 29 no nivel inter médiu ema na’in 32, ne’ebe hetan sasin hosi Embaixadór Portugal iha Timor-Leste, José Pedro Machado Vieira.

Jornalista : Zezito Silva

Editór : Manuel Pinto

1 KOMENTÁRIU

  1. Lian portugés importante mos ba Timor-Lorosa’e ho Tetun bazi iha Portugés fasilita mos komprensaun turista lian spaniol, italianu…furak (bonitu) lian sira: portugés, tetun.

HAKEREK NO HATÁN

Please enter your comment!
Please enter your name here