Reitór UNPAZ, matebian Lucas da Costa. Imajen Tatoli/Egas Cristóvão

DILI, 6 setembru 2019 (TATOLI) – Prezidente Repúblika, Francisco Guterres Lú Olo, ohin iha Palásiu Prezidente Nicolau Lobato, Bairru Pité, dekreta ona atu haloot Reitór UNPAZ no fundadór RENETIL, Lucas da Costa “Rama Metan” iha Jardim dos Herois da Pátria iha Metinaro atu fó omenájen tanba ninia kontribuisaun ba Independénsia nasionál.

Liuhusi Dekretu Prezidente Repúblika númeru 42/2019, publika ohin iha Jornal da República, tanba kontribuisaun ba Luta Libertasaun Pátria, Lucas da Costa “Rama Metan” iha direitu atu hetan onra fúnebre no haloot iha Jardim dos Herois da Pátria.

Lee mós: Líder RENETIL Husu Estadu Haloot Rama Metan iha Jardim dos Herois

Prezidente Repúblika bainhira hato’o sentidu kondolénsia iha Lucas da Costa “Rama Metan” nia uma-fatin hateten katak saudozu envolve kedas iha luta libertasaun nasionál hosi kedas inísiu no asumi kargu prinsipál iha periodu Base de Apoio ninian.

Periodu Base de Apoio influénsia tebes atu kontinua kontribui atu hasoru okupasaun Indonézia iha vila laran. Lucas da Costa “Rama Metan” iha kampu inimigu ninian harii RENETIL hamutuk ho fundadór sira seluk buka forma hodi luta hasoru rejime Soeharto.

Iha periodu ukun rasik-aan, Lucas da Costa “Rama Metan” mai ho vizaun ne’ebé haree dook hodi harii Universidade ba Páz (UNPAZ) atu forma ema Timor hodi kontribui ba dezenvolvimentu nasaun ninian. Prezidente Repúblika informa katak Lucas da Costa “Rama Metan” nia isin lolon mak laiha ona maibé ninian memória sei hela hamutuk nafatin ho timoroan sira ne’ebé sei moris.

Lucas da Costa “Rama Metan” nia iis kotu iha Hospital Nacional Guido Valadares (HNGV) iha 5 setembru 2019.

Jornalista: Cipriano Colo 

Editór: Xisto Freitas

HAKEREK NO HATÁN

Please enter your comment!
Please enter your name here