Diretór Eskola Ensinu Báziku Sentrál Biqueli, João dos Reis. Foto TATOLI: Tomé Amado

ATAÚRU, 06 setembru 2019 (TATOLI)- Diretór Eskola Ensinu Báziku Sentrál (EBC-sigla portugés) Biqueli, João dos Reis konsidera profesór sira iha Postu Administrativu Atauru ladún fokus iha atividade letiva ho estudante sira tanba problema saláriu.

Saláriu ba profesór sira iha Postu Administrativu Ataúru ne’e hahú husi $ 100 itál ba to’o $ 450 bazeia ba nivel eskalaun kada profesór.

Tanba ne’e mak profesór sira ne’ebé ninia nivel eskalaun ne’e ki’ik liu dala barak enfrenta problema.

“Entaun ninia efeitu ne’e alunu sira mak tenke enfrenta tanba profesór sira barak mak hela do’ok husi eskola tenke la’o ain kilometru 7 to’o 13 hodi hanorin alunu sira. Ne’e duni ita husu oinsá Ministériu Edukasaun bele hare obstákulu sira ne’e atu nune’e labele prejudika estudante sira ninia aproveitamentu iha aula laran,” hateten Diretór João dos Reis ba jornalista sira iha salaun Memorial suku Vila, Postu Administrativu Ataúru Munisípiu Dili, Sesta (06/09/2019).

Nia haktuir, eskola filiál barak mak iha área remota agora oinsá mak profesór ida bele asesu ba eskola sira ne’e kuandu distánsia hela fatin profesór sira nian do’ok tebes.

Se sira hanoin atu hela iha uma kontratu ruma mós presiza selu. Agora osan sira simu ne’e de’it mós ki’ik liu ona husi nesesidade família nian.

“Ita hatene iha Atauru distánsia eskola sira do’ok liu husi eskola iha Dili. Agora profesór sira kuandu fila ona husi eskola ba to’o uma tenke lokraik ho kondisaun kolen entaun loron tuir mai difikulta ona sira,” konsidera diretór eskola EBC Biqueli.

Iha programa diseminasaun ne’e, manorin na’in ne’e reforsa katak husu difikuldade ida ne’e mak Governu sentrál liuhusi MEJD tau importánsia ba kestaun saláriu profesór sira nian ba futuru sei laiha tan problema.

“Ha’u garante katak sira sei esforsa tuir rekizitu ne’ebé mak MEJD kria ona. Tanba ha’u nia profesór sira simu ona orientasaun husi ha’u atu kumpre regulamentu sira maibé razaun ida ne’e mak halo ha’u mós susar atu deside”

“Maibé husi esforsu ne’ebé mak parte eskola halo ona mak enkontru Konsellu Profesór nian aprezenta ona difikuldade sira ne’e ba superiór sira atu toma konsiderasaun maske la’ós agora maibé bele haree ba futuru no tenke pasa netik informasaun ruma atu nune’e profesór sira bele iha nafatin esperansa hodi hanoin,” espera Diretór João dos Reis.

Notísia relevante:EBF Makadadi Sei Tranforma Ba EBC

 Jornalista : Tomé Amado

Editór        : Rafy Belo

1 KOMENTÁRIU

  1. Hanesan Atauro oan, iha espereinsia no hatene muito bem
    Konaba, Saida mak professores sira iha Ilha de Atauro infrenta.
    Hanesan pedidu ba minnisteriú kompetente, rona lia halerik nebe liu husi Diretur nia lamentasaun, presija toma atensaun masimu, atu nune hodi bele hadia marorin sira nia Moris ba loron aban bainrua.
    -Manorin Forti
    – Alunus forti
    -Nasaun forti
    Obrigado.

HAKEREK NO HATÁN

Please enter your comment!
Please enter your name here