ATAURU, 06 setembru 2019 (TATOLI) – Eskola Ensinu Báziku Filiál (EBF) Makadadi, tempu badak, sei transforma ba Eskola Ensinu Báziku Sentrál (EBC-sigla portugés) tanba distánsia ba estudante sira atu asesu ba EBC Perola do’ok liu, maizmenus kilometru 50.

Koordenadór EBF Makadadi, Santiago Bosco de Oliveira hateten, Ministériu Edukasaun Juventude no Desportu (MEJD) intende ona relatóriu ne’ebé parte Eskola Filiál Makadadi nian aprezenta tiha ona maibé ho razaun labarik sira idade menor difísil atu asesu ba Eskola EBC ne’ebé ho distánsia kilometru 50.
“Ami aprezenta relatóriu ne’e ba MEJD tanba ezizénsia husi inan-aman sira nian tanba sira-nia oan sei ki’ik difisil atu asesu ba terseiru siklu tanba iha Makadiki bele atende de’it primeiru no segundu siklu”, tenik Koordenadór Santiago Bosco ba Jornalista TATOLI iha Eskola EBF Makadiki, sesta (06/09/2019).

Nia dehan resposta MEJD nian ne’e mak agora EBF Makadadi implementa ona terseiru siklu ho sétimu to’o nono ano. Ida ne’e nu’udar sinál ida hatudu katak EBF iha ona ninia paralelu signifika ho esforsu VIII Governu Konstitusionál nian bele lori ona Edukasaun besik liután ba komunidade iha área remota.

Maske prosesu ne’e kle’ur hahú kedas iha 2012 to’o ohin loron foin mak hetan novidade di’ak maibé koordenadór nia sente kontenti tebes. Ho eskola filiál ne’ebé nia lidera iha tornu rua primeiru, segundu no terseiru siklu. Durante ne’e, prosesu ensinu aprendizajen la’o normál hanesan mós eskola filiál sira seluk.

Iha Eskola EBF ne’e iha profesór na’in 22; permanente na’in sia, kontratadu sis, reklamadu na’in tolu no voluntáriu na’in ida. Enkuantu totál estudante husi primeiru to’o terseiru siklu hamutuk na’in 280.

Jornalista : Tomé Amado
Editór.       : Rafy Belo

HAKEREK NO HATÁN

Please enter your comment!
Please enter your name here