Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

DILI, 05 setembru 2019 (TATOLI)-Xefe Departamentu Abastesimentu Água, Munisípiu Dili,  Francisco Pereira Xavier, hatete, Servisu Água no Saneamentu (SAS),  buka hela meius  hodi uza provizóriu bee posu ne’ebé harii ona husi Kompañia HEINEKEN  hodi fornese ba Komunidade iha Aldeia Sukaer Laran, Suku Hera, Munisípiu Dili.

Notísia Relevante : DAA Halo Levantamentu ba Distribuisaun Bee Moos Iha Hera

“Daudaun  ne’e,  HEINEKEN mós halo bee posu (sumur bor) ida iha ne’ebá hodi ita nia komunidade sira konsumu ne’ebé mak ho débitu 0,2L/detik,  entaun ne’e mínimu tebes, maibé sira bele aguenta ho bee ne’ebé mak iha,” informa, Francisco Pereira Xavier, ohin, ba Ajénsia TATOLI, iha ninia servisu fatin Mascareñas, Caicoli,  Dili.

Mezmu nune’e, Francisco Xavier hatutan, diresaun SAS iha ona planu sei hadi’a kanalizasaun antigu ne’ebé JICA konstrui ona, antes ne’e, depois projetu  konstrusaun estrada diresaun Dili-Baucau remata.

Tuir Xefe Departamentu ne’e katak rezultadu verifikasaun SAS, foin lalais, iha Hera, identifika kanalizasaun bee moos balun hetan estragus tanba ne’e afeta ba falta bee moos ba konsumidór sira.

Problema seluk ida maka volume bee matan ne’ebé fornese bee ba komunidade tuun no  ameasa maran iha tempu bai loron naruk.

“Ami haree tiha ona no kanu naksobu duni,  nune’e mós ami ba to’o iha bee matan, maibé bee ne’e mínimu tebes- tebes,  tanba ne’e mak ita labele hadi’a,” Francisco Xavier tenik.

Jornalista : Osória Marques

Editór       :  Francisco Simões

HAKEREK NO HATÁN

Please enter your comment!
Please enter your name here