Ministru Estadu Prezidénsia Konsellu Ministru, Hermenegildo Augusto Cabral Pereira. Imajen Tatoli/Egas Cristóvão.

DILI, 04 agostu 2019 ( TATOLI)- Ministru Prezidénsia Konsellu-Ministru, Hermenegildo “Agio” Pereira partilla informasaun kona-ba dezenvolvimentu Timór nian durante enkontru ho ekipa delegasaun “Fact-Finding Mission”, iha Suai Room, Timor Plaza, ohin.

Ministru Agio Pereira hateten, iha enkontru ne’e ko’alia kona-ba misaun ASEAN (Organizasaun Sudeste Aziátiku) nian, nia partilla informasaun kona-ba Timor-Leste nia Konstituisaun, Sistema Governasaun ne’ebé ierarkia ba soberania haat maka Prezidente Repúblika, Parlamentu  Nasionál, Governu no Tribunál.

“Ha’u realsa katak ita-nia Prezidente Repúblika no ita-nia Parlamentu, povu maka hili rasik. Ita iha separasaun poder. Ne’ebé, misaun apresia tanba bele tulun sira intende di’ak liután,” informa Ministru Agio Pereira ba jornalista sira.

Iha biban hanesan, Governante ne’e haktuir, delegasaun husi ASEAN sira ne’e mós, preokupa kona-ba dezenvolvimentu kapasidade traballadór Timor-Leste nian (Labour Skill). Hatán ba preokupasaun Ekipa “Fact-Finding Mission”, Ministru Agio Pereira hateten, governu planu ona kona-ba dezenvolvimentu kapasidade rekursu umanu.

“Hanesan planu SEPFOPE atu halo sentru formasaun boot nian, ne’e sei diskute iha Parlamentu ba orsamentu 2020. Sentru formasaun ba ita-nia ema sira envolve kapasitasaun ne’e iha kondisaun no alojamentu kompletu,” haktuir governante ne’e.

Governante ne’e, iha biban hanesan, informa mós katak Eis-Vise Ministru Finansa, Helder Lopes aprezenta mós kona-ba senáriu kompletu husi dezenvolvimentu ekonomia nune’e mós governu Banku Sentrál, Abraão Vasconselos aprezenta senáriu dezenvolvimentu ba setór finanseiru no ko’alia mós garantia kréditu.

Nia hateten, husi aprezentasaun ne’e nia mós realsa liután: “Garantia kréditu ne’e importante ba investimentu tanba ita mós preokupa investimentu iha setór agríkola nian tanba ladún atraente ba investór sira no sei tulun empréstimu no sei tulun minimiza lakon banku sira nian bainhira sira fó empresta,” informa Ministru, Agio Pereira, relasiona ho aprezentasaun husi Eis-Vise Ministru Finansa, Helder Lopes no governadór Banku Sentrál.

Aleinde ne’e prezensa Eis-Ministru Petróleu, Alfredo Pires halo mós abordajen kle’an kona-ba setór minerál, gás no minerius hotu. “Nia aprezenta projetu Greater Sunrise, nia aprezenta potensialidade rai nian iha tasi mane no aprezenta dalan ne’ebé ita atu dezenvolve liután reseita husi setór ida ne’e,”  informa Ministru Agio Pereira .

Iha fatin hanesan, Governante ne’e informa mós kona-ba sujestaun ne’ebé delegasaun ekipa “Fact Finding Mission” nian sobre investidór sira. Katak, Timor-Leste mós tenke simu investidór husi nasaun ASEAN la’ós de’it husi rai seluk. “Hatán ba ida ne’e, Governu Timor-Leste prontu simu no dehan preparadu atu simu investór sira husi nasaun ASEAN,” Ministru Agio hateten.

Nia haktuir tan katak ekipa delegasaun ASEAN “Fact-Finding Mission” ne’e mós kestiona kona-ba estabilidade governasaun ida ne’e hola parte iha dezenvolvimentu konstitusionál tanba ASEAN iha pilár tolu; polítika, seguransa, ekonomia no sósiu-kulturál. Ita kobre tolu ne’e.

Notísia relevante:Ekipa Delegasaun ASEAN “Fact-Finding Mission” Enkontru Dahuluk Ho MNEK

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here