Ministru Negósius Estranjeirus no Kooperasaun (MNEK), Dionísio da Costa Babo Soares, Foto Hamutuk ho Ekipa ASEAN "Fact Finding Mission". Imajen/TATOLI

DILI, 04 setembru 2019 (TATOLI)-Ekipa delegasaun ASEAN “Fact-Finding Mission” hala’o enkontru dahuluk ho Ministériu Negósiu Estranjeiru no Kooperasaun (MNEK), iha ámbitu halo avaliasaun ba Timor-Leste nia preparasaun atu sai membru ASEAN (Organizasaun Sudeste Aziátiku-sigla inglés).

Ministru Negósiu Estranjeiru no Kooperasaun, Dionísio da Costa Babo Soares informa ba jornalista sira katak ekipa “Fact-Finding Mission” mai tuur hamutuk ho MNEK inklui Ministru Estadu Prezidénsia Konsellu-Ministru, Hermenegildo “Agio” Pereira, Ministru Fidelis Magalhães, Ministru Filomeno Paixão no timoroan sira ne’ebé mak envolve iha asuntu sosiál no polítika sira.

Ekipa “Fact-Finding Mission” halo pergunta ba ita hanesan halo teste ba ita, liuliu preparasaun atu hamutuk ho ASEAN, polítika Timor-Leste nian ba mundu no rejiaun nian oinsá.

“Ita preparadu ona tama, se ita preparadu atu tama ona karik, ita presiza atu halo saida, ita presiza hato’o saida. Sira hato’o pergunta ne’ebé espesífiku tebetebes tékniku, liuliu kona-ba ita-nia polítika externa, tanba ne’e ohin tuir enkontru ne’e, ha’u tenta lori governu nia naran responde para hateten katak, Timor-Leste iha pozisaun ida konvense sira katak ita bele tama organizasaun ida ne’e,” hateten Ministru Dionísio Babo Soares, iha salaun Suai Room, Timor Plaza, ohin.

Ministru Dionísio Babo haktuir, sira husu pergunta, porezemplu iha kontestu mundu ohin loron iha ASIA, iha kompetisaun entre forsa Amérika ho Xina, Timor-Leste nia pozisaun saida, depois se Timor-Leste sai membru ASEAN Timor-Leste nia pozisaun hanusá, liuliu kona-ba kestaun sira hanesan disputa.

“Membru balun ASEAN tama kona-ba South China Sea, depois pergunta sira ne’ebé iha relasaun mós ho ekonomia. Depois ita-nia kapasidade rekursu umanu preparadu ka lae, kualidade iha ka lae, saída mak ita halo, ne’e pergunta ida espesífiku tebetebes para haree, sira hodi dehan katak Timor iha kapasidade atu bele tama ASEAN ka lae”.

Diplomata timoroan ne’e informa tan katak troka notas tasi Timór nian entre Austrália no Timor-Leste, influénsia ba pozisaun Timor-Leste atu tama ba ASEAN; influénsia maka’as tebetebes. “Tanba ne’e hatudu katak ita iha soberania, ita bele jere ita-nia soberania independénsia, hateten katak ita forte, la iha nasaun ida labele mai atu lori ita arbiru de’it,” dehan ministru.

Ministru Dionísio Babo informa katak relasiona ho relasaun Timor-Leste nian ho país sira seluk: “Ami-nia (Timor-Leste) nasionál interese mak iha primeiru, lori husi nasionál interese mak sai hanesan lalenok hodi bele leno polítika saida mak ami halo iha ligasaun ho país sira seluk”.

Governante ne’e informa tan katak foin mak primeira vez ekipa delegasaun ASEAN “Fact-Finding Mission” mai halo, ne’ebé sira ikus fali mai sira sei halo fali ekonomia nian, mas bainhira. “Uluk dehan atu mai iha fin setembru agora sira muda fali karik, depois sira hakarak halo antes setembru tinan oin hotu tenke remata”.

“Ida mak agora daudaun kona-ba polítika, defeza no seguransa ho estratéjia ekonomia nian. Iha se mai oin fali kona-ba ekonomia nian los de’it, depois ida fali kona-ba sosiál-kulturál. Se ita la fiar aan, ita la’ós timoroan, timoroan ne’e tenke fiar aan,” tenik Ministru Dionísio Babo.

Entretantu, depois enkontru ho Ministru da Costa Babo Soares, ekipa delegasaun ASEAN “Fact-Finding Mission” sei hasoru malu mós ho Ministru Hermenegildo Pereira no Ministru Fidelis Magalhães.

Notísia relevante:Ohin, Ekipa Delegasaun ASEAN “Fact-Finding Mission” To’o Ona Iha Timor-Leste

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here