Ambulansia modernu rua ne'ebé entrega husi Ministru Estadu Prezidénsia Konsellu Ministrus, Hermenegildo Augusto Cabral Pereira, ba Prezidente RAEOA, Mari Alkatiri, ohin, iha Palásiu Governu. Imajen/Antonio Gonçalves

DILI, 04 setembru 2019 (TATOLI)-Vise-Ministru Dezenvolvimentu Estratéjiku Saúde, Bonifácio Maucoli dos Reis hateten, Ministériu Saúde (MS) rekoñese karreta ambulánsia multi-funsaun aat hotu tanba ambulánsia sira ne’e distribui dezde Kuatru Governu Konstitusionál. Karreta sira ne’e tuan ona no balun kondisaun avaria totál.

Tanba ne’e, Orsamentu Jerál Estadu tinan 2019 MS tau osan hamutuk rihun 900 itál dolár hodi hola karreta ambulánsia multi-funsaun ne’e.

“Prosesu aprovizionamentu la’o ona, ita hein tempu badak konklui ona dokumentu sira ne’e para bele haree kompaña ne’ebé mak nia kustu di’ak,” informa Vise-Ministru Saúde, Bonifácio Maucoli dos Reis, hodi konfirma ba Ajénsia TATOLI kona-ba Sentru Saúde sira balun karreta ambulánsia la iha, bainhira partisipa atividade Marsa ba Dame, iha Sentru Konvensaun Dili (CCD-sigla portugés), ohin.

Governante dehan, envelope fiskál 2020 nian kapitál menór la iha maibé ita halo proposta adisionál para hodi sosa tan ambulánsia multi-funsaun sira tanba agora daudaun karreta ambulánsia aat hotu ona.

“Tinan ida ne’e ita hola de’it 10 resin. Atu distribui la to’o, ita hatene iha munisípiu sira ne’e ita konta sentru saúde sira hamutuk 65. Sentru saúde ne’e mós presiza ambulánsia multi-funsaun,” hateten Vise-Ministru Maucoli.

Nia konfirma, ospitál referál hamutuk lima ne’e mós presiza karreta ambulánsia no munisípiu 12 inklui RAEOA (Rejiaun Administrativa Espesiál Oe-cusse Ambeno) ne’e mós presiza ambulánsia tanba ne’e mak to’o iha 2020 mak la tau nafatin  osan, ita la bele responde buat hirak ne’e.

“Tanba ne’e mak ita halo proposta adisionál para ba iha Komite Revizaun orsamentu ne’e para ita bele propoin hodi sosa karreta ambulánsia,” informa governante ne’e.

Notísia relevante:La Iha Ambulánsia, Família Aluga Mikrolete Transporta Inan-Isin Rua “Partus Kle’ur” Ba Ospitál

Jornalista: Felicidade Ximenes

Editór      : Rafy Belo 

HAKEREK NO HATÁN

Please enter your comment!
Please enter your name here