Família aluga karreta ba inan isin-rua hodi ba partus. Foto: Faustino Soares

DILI, 02 setembru 2019 (TATOLI)-Inan-isin rua ida ho naran Celina Freitas, husi Suku Uaitame, Postu Administrativu Quelicai, Munisipiu Baucau, família aluga mikrolete hodi transporta ba iha Ospitál Referál Baucau, hodi hetan atendimentu husi pesoál saúde sira.

Portavós família, Faustino Soares haktuir kronolojia via e-mail ba Ajénsia TATOLI, ohin, katak iha loron domingu, 01 setembru 2019 inan isin-rua  ne’e hetan kazu moras hanesan “Partus Kle’ur” entaun tenke transfere ba Ospitál Referál Baucau hodi kontinua halo tratamentu ne’ebé ho ekipamentu médiku ho rigór tanba uluk konsege halo operasaun ba oan dahaat nian.

Maibé, laiha transporte hanesan Ambulánsia Saúde nian ne’ebé bele tula inan grávida ho kondisaun grave ne’e mai Baucau.

Nia haktuir, Kaben husi inan isin-rua ne’e, Mario Freitas hateten: “Desizaun husi pesoál saúde iha Sentru Quelicai ne’ebé mak transfere pasiente mai ospitál referál Baucau ne’e komesa mais ou menus tuku 14:30 tanba kondisaun Inan grávida ne’e komplikadu maibé Ambulánsia laiha entaun hein to’o tuku 18:40 mak foin ami família aluga karreta mikrolete ida hodi transporta mai Baucau”.

Tuir portavós família pasiente, Faustino Soares katak Problema Ambulánsia laiha ne’e, pasiente Inan grávida refere hasoru situasaun ne’ebé sofre liután, tanba parte Sentru Saúde Quelicai laiha fasilidade ne’ebé mak hanesan iha Ospitál Referál Baucau no Ospitál Nasionál hodi fó asisténsia saúde ne’ebé adekuadu, só dalan úniku mak tenke transporta mai Baucau maibé laiha Ambulánsia.

Família pasiente husu tulun bá Sentru Saúde Quelicai atu halo esforsu másimu maibé karreta laiha tanba Ambulánsia ida de’it ne’ebé mak avaria kle’ur ona. Entaun Parte Pesoál Saúde sira mós kontinua kontaktu mai Ambulánsia iha Munisipál hodi ajuda pasiente ne’e maibé transporte laiha hotu.

Hahún bá problema Ambulánsia ne’e, família pasiente tenke aluga transporte públiku hanesan Mikrolete ho montante osan dolar haat nulu amerikanu ($ 40,00) hodi tula Inan grávida ne’ebé kondisaun grave ne’e mai Ospitál Referál Baucau, ho tristeza tanba nu’udar povu kbiit laek ne’ebé laiha ekonomia favoresida

Portavós família, Faustino Soares konta tuir tan katak durante viajen husi Sentru Saúde Quelicai mai Ospitál Referál Baucau kuaze oras rua resin, maibé Inan grávida nian kondisaun ne’e moras aumenta liután tanba Estrada diresaun husi Quelicai mai Baucau Vila aat tebes, no mós transporte hanesan Mikrolete, katak la merese atu tula pasiente nian kondisaun ida ne’ebé grave uitoan.

“Ha’u nu’udar família pasiente sente triste no lamenta tebes ba situasaun ida ne’e, tanba ita povu kbiit laek sai diskriminadu husi ukun na’in sira. Ita haree realidade katak ema boot sira iha kapitál mak hetan moras ruma sempre halo atendimentu ida ne’ebé ho lalais, maibé kuitadu ita povu ki’ik no ki’ak sira iha área rural ne’e sempre sai ignoradu no marjinalizadu husi ukun na’in sira ne’ebé ita hili, liuhusi eleisaun jerál périodu ba périodu,”.

Faustino Soares relembra preokupasaun, Kaben husi Inan isin-rua, Mario Freitas katak: “Ho problema ambulánsia ne’ebé mak sai asuntu sériu iha Postu Administrativu Quelicai, Munisipiu Baucau mak ha’u nu’udar família ka kaben husi pasiente ne’e ho lian maka’as husu bá VIII Governu Konstitusionál, liu-liu Vise Ministru Dezenvolvimentu Estratéjiku Saúde no Ministru Saúde ein Ezersísiu presiza rezolve ho imediatu bá Karreta Ambulánsia husi Sentru Saúde Quelicai ne’ebé mak avaria kleur ona.

“Tanba problema ne’ebé pasiente sira hasoru hanesan Ambulánsia ne’e beibeik ona maibé kontinua abandona”.

Notísia relevante:Sentru Saúde Formosa Infrenta Difikuldade Ba Ambulánsia

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here