Inspetór Jerál Estadu, Francisco de Carvalho.

DILI, 04 setembru 2019 (TATOLI)-Inspesaun Jerál Estadu (IJE), finaliza ona prosesu investigasaun ba kazu má administrasaun no indísiu korrupsaun hamutuk 22 ne’ebé komete husi Funsionáriu Públiku no ajente administrasaun Estadu sira durante janeiru to’o agostu 2019.

Notísia Relevante : IJE Rejista Kazu Má Administrasaun Aas iha 2017

Inspetór Jerál Estadu, Francisco de Carvalho, hatete, ninia parte rejista kazu hirak ne’e, bazeia ba keixa husi públiku no  auditória  ba liña ministeriál ne’ebé iha ligasaun ho  administrasaun públiku direta no indireta.

Husi kazu 22 ne’e, rejista funsionáriu sira uza viatura estadu karreta no motor inklui osan estadu la tuir regra.

Husi relatóriu pakote primeiru ne’e IJE  rekomenda ona ba Primeiru Ministru, Taur Matan Ruak,  hafoin fó orden ba Ministériu relevante ne’ebé  iha kompeténsia hodi kontinua halo prosesu ba oin,” informa  Francisco de Carvalho, hodi responde Ajénsia  TATOLI, iha Lecidere,  tersa  (03/09/2019).

Notísia Relevante : PDHJ Simu Keixa 88 Kona-ba Mal Administrasaun

Make nune’e, Francisco de Carvalho, la deskreve loloos kazu hirak ne’e akontese iha Ministériu no instituisaun estadu ida ne’ebé.

Tuir Nia, kazu má administrasaun kada tinan kontinua akontese  tanba funsionáriu Públiku balun komete kazu ne’e tanba laiha koñesimentu kle’an ba lei no regulamentu, maibé  balun hakarak viola  ba  interese pesoál.

“Ida ne’e akontese tanba ita nia ema servisu iha instituisaun estadu balun iha formasaun no balun  laiha formasaun,” nia tenik.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here