logotipu PDHJ

DILI, 27 agostu 2019 (TATOLI)-Provedoria Direitu Ema-Nian no Justisa (PDHJ-sigla portugés) durante fulan janeiru to’o agostu 2019, simu  keixa hamutuk 88 kona-ba kazu pratika mal administrasaun públika.

PDHJ mós rejista keixa  hamutuk 63 kona-ba violasaun direitu ema nian maioria  husi atuasaun Polisia Nasionál Timor-Leste (PNTL) bainhira atua komunidade iha terrenu.

Provedora Jesuina Maria Ferreira Gomes. Imajen/Portal Ofisiál PDHJ

Provedora Diretu Ema Nian no Justisa (PDHJ), Jesuina Maria Ferreira Gomes, relata, keixa hirak ne’e simu diretamente husi komunidade liuhusi kontaktu telemovel no karta aberta ba edifísiu PDHJ Caikoli, Dili,  hamutuk 87, hosi Munisípiu Baucau 33, Bobonaro 14, Oé-Cusse sia  (9) no Same hamutuk keixa ualu (8).

“Husi keixa 151 ne’ebé PDHJ iha prosesu investigasaun hamutuk 67 kazu la’o hela, loke refere ba entidade relevante 21 kazu, adia desizaun iha kazu tolu (3), keixa  ne’ebé arkivu ona iha haat (4), keixa 24 taka ona hodi haruka fila ba instituisaun seluk tanba la tama iha kompeténsia PDHJ no keixa 22 maka seidauk analiza hodi hakerek relatóriu avaliasaun preliminár,” informa  Provedora, Jesuina Maria Ferreira Gomes, durante lansamentu relatóriu monitorizasaun no investigasaun faze da-ruak 2019 iha salaun PDHJ.

Atu promove  Governasaun di’ak no proteje diretu ema nian, tuir Provedora katak presiza servisu hamutuk entre entidade hotu hodi alkansa objetivu dezenvolvimentu nasionál.

Jornalista : Nelson de Sousa

Editor      : Francisco Simões

HAKEREK NO HATÁN

Please enter your comment!
Please enter your name here