Diretor MNEC, Jorge.Imajen/ Antonio Goncalves

DILI, 03 setembru 2019 (TATOLI)-Ekipa Delegasaun “Fact-Finding Mission” husi país 10 ASEAN (Organizasaun Sudeste Aziátika-sigla inglés) nian, ohin to’o ona Timor-Leste, ho aviaun Citilink iha Aeroportu Internasionál Prezidente Nicolau Lobatu, Dili, iha tuku 12:30.

Hafoin Delegasaun ekipa “Fact-Finding Mission ” ASEAN ne’e tuun husi aviaun, simu direita husi Diretór Jerál Asuntu ASEAN, Jorge Trindade Neves Camões, no Diretór Jerál ba Protokolu no Mídia, Ministériu Negósiu Estranjeiru (MNEK), Juvêncio de Jesus Martins no mós ekipa téknika ASEAN nian.

“Sira hotuhotu agora mai ona iha Hotel Timor-Plaza, balun hela iha Hotel Ramelau, nasaun 10 ne’ebé to’o Timór, hanesan Brunei, Kamboja, Laos, Myanmar, Vietnam, Indonézia, Tailándia, Filipina, Singapura, sira mak iha ne’e hotu, kedas,” hateten Diretór Jerál Asuntu ASEAN Jorge Trindade Neves Camões ba jornalista sira, iha Timor-Plaza, ohin.

Diretór Jerál Jorge Trindade Neves Camões, informa katak sira mai hanesan “Fact-Finding Mission” atu asses (avalia) buat ne’ebé uluk sira halo tiha ona ba Timor-Leste.

“Ekipa ida ne’e ba ekipa Fact-Finding Mission ba asuntu polítika seguransa, sira sei halo hasoru malu ho ita-nia lideransa polítiku sira, Ministru Negósiu Estrangeiru, Ministru Agio, Ministru Fidelis Magalhaes, ho Prezidente Repúblika, Primeiru-Ministru, Prezidente Parlamentu Nasionál no mós eminentes sira balun, ho tékniku sira husi Linas Ministeriais relevante, atu haree, diskute uituan kona-ba preparasaun ita nian atu tama iha ASEAN ne’e hanusa”.

Nia informa, Iha momentu ne’e hakarak atu dehan ba sira buat hotu  ne’ebé ita iha, kapasidade ne’ebé ita iha atu asegura, ita-nia integrasaun ba ASEAN.

“Ita atu reafirma nafatin ita-nia komitmentu, ita-nia determinasaun atu hola parte iha ASEAN, ita sei dehan ba sira katak Timor-Leste bele tama ita bele kontribui, ita sei la lori naha todan ba sira, mais ita prontu hamutuk ho sira lori naha ASEAN nian, lori naha komunidade ASEAN nian atu ba oin”.

Diretór ne’e esplika katak, ita iha kapasidade finanseira, ita iha kapasidade organizasaun ba eventu ASEAN ninian, ho tan sira seluk ita hala’o atividade lubuk boot ida iha ne’e.

“Ita hatudu katak ita bele kontribui, ita bele organiza eventu bo’ot sira, hanesan sira ne’e inklui kapasidade ita nian atu organiza eventu ASEAN nian iha tempu oin, kuandu ita tama ona iha ne’ebá”.

Nia informa tan, sira sei iha enkontru ida ho Ministru Defeza, depois sei hasoru mós tékniku Ministériu Defeza ninian no mós ho FFDTL sira atu haree saida mak ita iha, saida mak ita seidauk iha, saida mak ita bele hamutuk ho sira, ita halo iha parte defeza no seguransa ninian.

“Ministériu Interiór sira mak sei ba hamutuk ho nível tékniku sira atu esplora, atu diskute sasan ne’ebé ita iha, sasan ne’ebé ita seidauk iha, sasan saida mak ita bele halo hamutuk ho sira, atu eleva ita-nia kapasidade defeza no seguransa ninian”.

Diretór Jerál Jorge Camões hateten, tanbá “Fact-Finding Mission” ida ne’e “Fact-Finding Mission” ba polítiku no seguransa tanba ne’e importante.

“Ita-nia defeza seguransa hasoru malu ho sira, iha ekipa ne’e nia laran mós iha reprezentante husi pilár ekonomia ho sósiu-kulturál ninian, inkorpora hotu iha ne’ebá, tanba ne’e durante iha diskusaun ne’e ita sei expose mós kapasidade hotu ne’ebé ita iha, iha área ekonomia ninian, iha área sósiu-kulturák ninian, ita sei aprezenta ba sira projetu tasi mane ninian.

Nia informa tan katak, planu ita nian, planu estratéjiku ne’ebé ita iha. Saida-saida mak ita halo iha Banku Sentrál, sira mós sei halo aprezentasaun balun iha ne’ebá, ita-nia parte Ministériu Finansas sira mós sei halo, husi parte minerais sira mós sei halo aprezentasaun iha ne’ebá, atu hatudu buat hotuhotu, ne’ebé iha no buat hotuhotu ne’ebé ita hakarak halo, vizaun hotu ne’ebé ita iha, ba país ida ne’e.

Entertantu, husi delegasaun ekipa “Fact-Finding Mission” husi país 10 ohin to’o Timor-Leste totál ema na’in 60, mai kompletu. Sira to’o hotu ohin; na’in rua to’o ho aviaun Sriwijaya.

Jornalista : Nelia Fernandes

Editór: Rafy Belo

HAKEREK NO HATÁN

Please enter your comment!
Please enter your name here