DILI, 03 setembru 2019 (TATOLI)—Governu liuhusi Ministériu Saúde hamutuk ho parseiru Dezenvolvimentu Internasionál Organizasaun Saude Mundiál (OMS) hala’o workhsop nasionál  ho tema “Diskuti no Finaliza Esbosu Planu Estratéjiku Nasionál Rekursu Umanu Setór Saúde 2020-2024” atu diskute no finaliza esbosu planu estratéjiku nasionál rekursu umanu setór saúde 2020-2024.

“Ministériu saúde ho parseiru dezenvolvimentu sira diskute planu setór saúde liliu liga ba rekursu umanu ne’ebé sai prioridade liu ba Ministériu Saúde. Tanba ita hatene katak rekursu umanu mak nu’udar forsa ida ne’ebé bele hametin sistema nasionál saúde  ida ne’e hodi responde ba preokupasaun  sira ne’ebé dezde ita restaura independénsia to’o agora,” dehan Vise Ministru Saúde Asuntu Dezenvolvimentu Estratéjiku Saúde, Bonifacio Maucoli dos Reis, iha nia diskursu bainhira hala’o workshop nasionál hamutuk ho parseiru dezenvolvimentu sira iha Timor Plaza, ohin.

Programa oitavu Governu Konstituisionál nian iha área saúde, nia hatutan, programa esensiál hitu (7) mak Governu hala’o mak hanesan prestasaun kuidadu saúde, prestasaun saúde ospitalaria, infraestutura iha setor saúde, distribuisaun medikmamentu ekipamentu no laboratóriu,  siénsia medikas, jestaun mal nutrisaun ba setór saúde no rekursu umanu. Programa ida ne’e, aliña no armoniza iha planu estratéjiku nasionál iha setos saúde nian iha 2019 -2020.

Nia dehan, disponibilidade ba rekursu umanu ba nível sira hotu ba kuidadu saúde iha fatór importante ida hodi asegura profisaun pakote serbisu saúde ho ezisténsia objetivu  ba nível hotu-hotu.

“Tuir dadus Diresaun Nasionál Rekursu Umanus hato’o mai ita katak dezde ita restaura ita-nia independénsia ate agora, totál profisionál saúde hamutuk ema 4.914 ne’ebé kompostu husi médiku jerál  894, médiku espesialista 29, enfermeiru 1.272, parteira 619, tékniku radiodiagnostiku 634, enfermeiru asistente 234, ne’ebé agora daudaun asegura prestasaun saúde iha Timor-Leste,” nia informa.

Governante ne’e haktuir, husi profisionál saúde hirak ne’e, barak liu mak integra iha Rezime Esensiál hamutuk ema 3.125 kompara ho profisionál saúde sira ne’ebé integra iha Rezime Jerál hamutuk ema 1782.

“Ita presiza ninia retornu. Signifika, progressivamente lukru funsionáriu ka pesoál saúde iha aumentu tebes maibé oinsá kona-ba distribuisaun destakamentu dezenvolvimentu karreira profisionál, abilidade no kapasidade promosaun karreira  sira ne’ebé atu enderesu iha funsionalizmu públiku husi Rezime Jerál no Rezime Espesiál,” dehan Maukoli.

Governante hateten, entermus rekursu umanu Timor-Leste sei falta nafatin no prezisa halo tan rekrutamentu ba profisionál saúde sira. Tanba ne’e mak iha tinan ida ne’e (2019), Governu  rekruta tan ema hodi loke vaga ne’ebé alokadu husi Komisaun Funsaun Públika (sigla portugéz, CFP) ba Ministériu Saúde hamutuk 320 vagas. Tanba ne’e mak agora planu hela atu halo rekrutamentu hodi nune’e bele koloka ba fasilidade saúde sira ne’ebé mak sei menus hela.

Entretantu, partisipante sira ne’ebé partisipa workshop ne’e mak Parseiru Desenvolvimentu Internasionál OMS, Diretór Nasionál no Munisípal, reprezentante ajénsia nasionál nomós internasionál, profisionál saúde no reprezentante Fakuldade Siénsia Saúde Medisina UNTL.

Notísia relevante:Posibilidade, Ministériu Saúde Sei Loke Vaga 320

Jornalista: Felicidade Ximenes

Editór .    : Rafy Belo

HAKEREK NO HATÁN

Please enter your comment!
Please enter your name here