Vise Ministru Ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen/Egas Cristóvão

DILI, 22 jullu 2019 (TATOLI) –Vise-ministru Dezenvolvimentu Estratéjiku Saúde no Ministru Interinu, Bonifácio Maukoli dos Reis informa katak Ministériu Saúde (MS) halo ona deskonzelasaun kona-ba konzelasaun iha Sétimu Governu Konstitusonál ba rekrutamentu rekursu umanu hodi presta servisu iha MS.

“Entaun ita halo karta deskonzelasaun ba primeriu-ministru no primeiru-ministru aseita ona atu halo rekrutamentu ba tinan ida ne’e, maibé ita hatene katak Komisaun Funsaun Publika mós iha hela tempu atu bele halo promosaun ba réjime kareira jerál ne’ebé mak husi grau 1 ba grau 2 husi grau 2 ba grau 3,” hateten Vise-ministru, Bonifácio Maukoli dos Reis ba jornalista sira, iha Sentru Konvensaun Dili (CCD-sigla portugés), segunda (22/07/2019).

“Tanba ne’e mak sei iha difikuldade oituan maibé husi ami  husu nafatin ba Komisaun Funsaun Publika para fó prioridade tanba nesesidade ne’ebé Ministériu Saúde identifika mak falta rekursu umanu,” reforsa tan governante ne´e.

Nia hatutan: “Ita hatene katak postu saúde balun médiku la iha no médiku balun servisu tinan barak ona no mós ita presiza halo mudansa entaun presiza instituisaun tanba ne’e mak vaga 320 ne´e importante,” reforsa tan governante ne´e bainhira partisipa komemorasaun loron nasionál  saúde datoluk ho tema “Lori Saúde Ba Ema Hotu Atu Moris Di´ak Ho Dignu”.

 Loron Nasionál Saúde

Relasiona ho komemorasaun loron nasionál saúde ba datoluk, Vise-ministru, Bonifácio Maukoli dos Reis hateten: “ Tema ohin loron nian atu reflete ba pesoál saúde sira atu kontinua servisu ho di´ak, hodi hakbesik liután saúde ba komunidade tomak, ne’ebé hela iha área remotas”.

Vise Ministru Ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis (Loos) Akompaña husi Vise Ministra Kuidadu Saúde Primária, Elia dos Reis Amara L. Hasai Foto Hamutuk iha Lansamento Livru Manual Bolsa Estudu Seitór Saúde. Caicoli,Dili, Segunda (22/07/2019).Imajen/Egas Cristovão

Governante ne´e esplika, konstituisaun hateten ona katak sidadaun hothotu iha direitu atu promove no defende no mós MS iha obrigasaun atu harii sistema nasionál ida ne´ebé universál gratuitu ba ema hotu.

Nia haktuir, iha selebrasaun loron nasionál ne´e antes tama selebrasaun buat barak mak MS halo ona liliu oinsa atu harii fasilidade saúde sira ne´ebé mak ita haree iha tinan ida ne´e, 20 ital projetu mak harii no liliu ba postu saúde sira ne´ebé ho populasaun 1.500 ba leten. “Tanba ne´e mak ita harii postu saúde sira ne’e para fó asisténsia di´ak liután”.

Vise-ministru, Bonifácio Maukoli dos Reis hatutan: ”Harii tiha fasilidade saúde ita mós haree ba kestaun rekursu umanu no kada rekursu umanu, tuir Ministériu Saúde nian, Oitavu Governu Konstitusionál, kada fasilidade saúde iha médiku ida, enfermeriu rua, parteira rua no más farmasista ida, atu nune’e fó asisténsia di´ak no kualidade ba ita-nia komunidade sira”.

Entretantu, artigu ne´ebé mak ko´alia kona-ba saúde iha Konstituisaun Repúblika Demokrátika Timor-Leste mak artigu 57º.

Jornalista   : Felicidade Ximenes

Editór         : Rafy Belo

1 KOMENTÁRIU

HAKEREK NO HATÁN

Please enter your comment!
Please enter your name here