Inisiu prosesu konstrusaun ba projetu Jardín no PonteB.J.Habibie. Imajen/Eugénio Pereira

DILI, 02 setembru 2019 (TATOLI)-Komandu Polisia Nasionál Timor-Leste (PNTL) Munisípiu Dili husu ba motorista sira atu labele para motor no karreta iha ponte leten B.J. Habibie, Bidau Santa-Ana, hodi prevene engarrafamentu no asidente tráfegu.

Notísia Relevante : Xefe Suku Bidau Santa-Ana husu Juventude Asegura Ponte ho Jardín Habibie

Komandante Polisia Dili, Superintendente Asistente, Euclides Belo, informa, daudaun ne’e ekipa tránzitu no Diresaun Nasionál Transporte Terrestre (DNTT) monta ona sinais tránzitu hodi bandu públiku para iha fatin refere.

 “Ita husu ba públiku bainhira lori família ba ne’ebé transporte labele para fali iha ponte leten, tanba ita nia Diresaun Nasionál Transporte monta iha sinais tránzitu iha ne’ebá,” informa Euclides  Belo, ohin, ba jornalista iha ninia servisu fatin Caicoli, Dili.

Komandu mós sei koloka Polisia Tránzitu hodi halo kontrolu no haree movimentu transporte públiku iha área Ponte B.J. Habibie ho Jardin B.J. Habibie.

Polisia mós bandu atu joven sira konsume tua iha Jardin B.J. Habibie, Jardin Motaél, Largo Lecidere, Tasi Tolu, Jardin 5 de Maiu, Colmera no área Kristu Liurai.

Nia dehan, tuir planu ekipa husi PNTL no DNTT sei halo mós sosializasaun informasaun ba komunidade atu para karreta no motor tuir regra DNTT hodi evita asidente tráfegu no engarrafamentu.

Antes ne’e, Xefe Suku Bidau Lecidere, Luis Ribeiro Soares Pereira,  husu ba PNTL atu harii postu tránzitu besik Ponte Habibie hodi kontrola transporte labele para arbiru iha ponte leten.

Husu mós ba vizitante sira atu labele estraga ai-funan, du’ut, fatin halimar ba labarik inklui lampu sira iha Jardin laran.

Tuir observasaun Ajénsia TATOLI,  nota mezmu DNTT monta ona sinais tránzitu hodi bandu transporte para iha ponte leten, maibé komunidade kontinua kontra hodi para sira ninia karreta no motor iha área proibidu.

Jornalista         : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here