Ponte ho Jardín B.J. Habibie iha faze finál. Imajen/ Osória A. Marques

DILI, 21 agostu 2019 (TATOLI)-Ponte ho Jardín B. J. Habibie, iha faze final konstrusaun nian no ponte ho jardín ne’e kompleta tan Dili nia furak iha tasi ibun Bidau Santa-Ana.  Tanba ne’e, Xefe Suku Bidau Santa-Ana, João Paulo de Andrade, husu ba juventude sira atu asegura jardín ho ponte ne’e nia furak orijen.

Notísia Relevante : 25 Agostu, BTK Finaliza Konstrusaun Jardín B.J. Habibie

Jardín B.J. Habibie iha Faze Finál. Imajen/Osória A.Marques

“Ponte ho Jardín ne’e kompleta Dili nia furak no istórikamente naran B.J. Habibie ne’e nu’udar kompromisu no onra ida ne’e Timoroan oferese ba eis Prezidente Repúblika Indonézia nian ne’ebé kontribui aseita halo Referendu ba ita Timoroan atu hili no termina ita nia destinu rasik iha 1999,”  hateten Xefe Suku João Paulo de Andrade, hodi responde ajénsia TATOLI ohin iha nia servisu fatin.

Nia hateten, autoridade munisípiu ho suku sei tau matan ba jardín ho ponte B.J Habibie, maibé juventude sira nia kontribuisaun mós importante atu la bele halo aat jardín nia furak.

Xefe Suku Bida Santa-Ana, João Paulo de Andrade.

“Ha’u sempre ko’alia ho parte Ajénsia Dezenvolvimentu Nasional (ADN) katak ba futuru oinsá mak bele koopera hamutuk para halo limpeza no seguransa ba fatin ne’e,” afirma João Paulo de Andrade.

Nia mós husu ba nia komunidade ho juventude sira iha Bidau Santa-Ana tau matan lisuk ba fasilidade hotu ne’ebé monta iha jardín no ponte atu ema la bele estraga.

 Jornalista          : Osória A. Marques

Editór                : Francisco Simões

 

HAKEREK NO HATÁN

Please enter your comment!
Please enter your name here