Señora ida hakat iha pasadeira (zebra cross) iha Palásiu Governu nia sorin.

DILI, 02 setembru 2019 (TATOLI)-Xefe Departamentu Sinál no Tráfiku husi Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva, hatete sinál tránzitu liuliu zebra cross (pasadeira) ne’ebé hahú “lakon” iha estrada, DNTT sei rezolve iha outubru ne’e.

Antes ne’e, DNTT pIhlaneia atu pinta fali pasadeira molok Loron Konsulta Populár iha 30 agostu, maibé kontratu ba kompañia ne’ebé toma konta ba kestaun ne’e remata, nune’e presiza loke fali konkursu foun.

Konkursu públiku ne’e aprovizionamentu MTK prosesa ona no sei publika iha tempu badak. “Ami garantia prosesu sira ne’e, aprovizionamentu husi Ministériu Transporte no Komunikasaun finaliza ona no outubru ami bele hahú hala’o serbisu hodi pinta foun zebra cross no novembru bele hotu”, Xefe Departamentu Tráfiku informa ba Tatoli iha Balidi, ohin.

Tanba tama ba iha novembru, tempu udan no tinta ne’e labele kona udan-been, nune’e maka DNTT esforsu hodi rezolve kestaun ne’e iha fulan oin.

Demarkasaun ba iha sinál zebra cross antes ne’e kaer husi kompañia Montana Di’ak, Unipessoal Lda, ne’ebé pakote hamutuk kedan ho reabilitasaun estrada nian.

João Eugénio haktuir Zebra cross nia durasaun tinan tolu ba haat ona no tinta depende ba kualidade estrada tanba bainhira udan demais no loron manas liu nia bele moos.

Notísia relevante : DNTT Sei Rezolve Zebra Cross Ne’ebé Hahú “Lakon” Iha Estrada

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here