Adjuntu Autoridade Munisípiu Dili, José Ximenes Pereira Smith, Imajen/Egas Cristovão

DILI, 2 setembru 2019 (TATOLI)-Adjuntu Munisípiu Dili, José F. Ximenes Smith, hatete, Autoridade Munisipál koloka ona pesoál seguransa  iha Jardín B.J. Habibie hodi asegura fasilidade públiku ne’ebé instala iha jardín laran.

Notísia Relevante : Polisia Bandu Transporte Para iha Ponte B.J. Habibie

“Ohin dadeer ha’u bolu ona Ekipa Jestaun Merkadu no Saneamentu. Ami mós  koloka ona seguransa iha Jardín B.J. Habibie, Bidau Santa-Ana, hodi tau-matan no kuida nafatin fasilidade jardín nian,” informa, José Smith, ba Ajénsia TATOLI, ohin, iha edifísiu Administrasaun Postu Dom Aleixo, Fatuhada,  Dili.

Nia dehan,   maske rona informasaun kona-ba fasilidade balun iha jardín refere hetan estragus  husi ema deskoñesidu maibé sei dauk identifika loloos.

“Ami mós preokupa ho situasaun hirak ne’e tanba ne’e mak ami husi Munisípiu Dili nafatin fó atensaun ba sasán hirak ne’e no esforsu atu haree kondisaun.  Maibé ami mós hein Ajénsia Dezenvolvimentu Nasionál (ADN) bainhira mak entrega ba Munisipiu tanba servisu hirak ne’e AND nia kompeténsia,” Jeca Smith hateten.

Ba jardín antigu sira, Administradór Postu Administrativu Dom Aleixo provizóriu ne’e dehan, sei mantein ho númeru seguransa ne’ebé destakadu  antes ne’e  hodi fó seguransa, maibé ba jardín B.J. Habibie sei halo aproximasaun ho kompañia privada balun hodi fó seguransa.

Ekipa saneamentu mak daudaun ne’e  organiza membru Pesoál limpeza ezgotu  hodi halo limpeza  no rega jardín sira iha Dili inklui Jardín B.J. Habibie.

 Jornalista        : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here