Xefe Sentru Saúde Formosa, Jaime dos Reis Belo

DILI, 3 jullu 2019 (TATOLI)—Sentru Saúde Formosa hetan difikuldade ba transporte (ambulánsia) tanba kondisaun ladi’ak atu fasilita pasiente sira.

“Transporte ne’ebé Sentru Saúde Formosa uza ba pasiente sira uza ba iha rai tetuk de’it. Área Formosa ne’e baliza ho Balibar, tan ne’e sa’e ba leten hanesan Balibar labele tanba kareta kondisaun ladi’ak,” informa Xefe Sentru Saúde Formosa, Jaime dos Reis Belo ba Agência Tatoli iha nia kna’ar fatin, Bairru Formosa, Dili, ohin.

Nia hatutan, difikuldade seluk ne’ebé agora dadaun Sentru Saúde Formosa infrenta mak hanesan kontainer ne’ebé uza ba kuartu hodi halo tratamentu saúde ba pasiente ne’e mós aat hotu ona.

Jaime haklaken ONG balun mak ajuda hadi’a ona kuartu rua hodi fasilita hela pasiente sira uza halo tratamentu no sira seluk aat hotu. Kuartu hamutuk sanulu. Rua mak di’ak no ualu mak ho kondisaun aat.

“Ekipamentu hanesan kama mós la sufisinte hotu ona maibé ne’e la’ós kestaun boot ba ami para atu labele serbisu. Ami nafatin serbisu maibé ami hato’o ona ba instituisaun kompetente liliu ba Ministériu Saúde maibé prosessu sei la’o neneik ba neneik,” nia haktuir.

Xefi Sentru Saúde Formosa ne’e tenik katak inan isin rua mai partu iha sentru refere laiha hasoru difikuldade tanba iha ne’ebá pesoál saúde hanesan parteira atende ho di’ak, maibé kuandu iha komplikadu balun, mak sei transfere ba Hospital Nacional Guido Valadares (HNGV).

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here