Ministra Edukasaun, Juventude no Desportu Dulce de Jesus Soares .Imajen/TATOLI

DILI, 02 setembru 2019 (TATOLI) – Ministra Edukasaun Juventude no Desportu (MEJD), Dulce de Jesus Soares hateten, MEJD mós prepara ona regra ba ekipa unidade Kurríkulu ho rigorozu. Tan ne’e regulamentu interna Gráfika Nasionál Timor- Leste (GNTL) ne’e atu reforsa tan servisu funsionáriu sira nian durante prosesu nia laran.

“Se se de’it mak tama iha GNTL tenke kumpre regra ne’ebé hatuur tiha ona. Tanba MEJD liu husi unidade kurríkulu mós iha ona regra ida espesífiku kona-ba prosesu ezame nasionál,” hateten Ministra Dulce de Jesus Soares, iha edifísiu GNTL, Colmera, segunda (02/09/2019).

Nia dehan, regra MEJD nian hatuur ona durante prosesu impresaun fontes ezame nasionál to’o matéria sira ba loke iha sala aula laran depois fila fali mai hodi prienxe iha sistema eletróniku ikus liu entrega fali ba profesór sira hodi prienxe ba sertifikadu hatuur hotu ona iha regulamentu.

Regra sira ne’ebé mak MEJD kria ne’e atu garante transparénsia iha prosesu nia laran hodi nune’e bele antesipa fallansu ne’ebé mak bele akontese iha futuru mai. Tan ne’e funsionáriu sira ne’ebé mak hetan ona konfiansa hodi halo preparasaun ba pontu ezame nasionál ne’e tenke servisu ho dignu hodi lori prosesu ne’e to’o rohan.

“Ha’u husu ba ema hotu ne’ebé servisu ba progresu ida ne’e atu kumpre regra ne’ebé aplika iha GNTL no mós regra ba ezame nasionál nian,” dehan governante ne’e.

Tanba husi regra sira ne’e, tuir ministra, mak bele iha liña koordenasaun ida di’ak, bele kontrolu malu, bele garante servisu hotu la’o tuir ninia dalan, tuir tempu no mós tuir desizaun ida de’it.  “Ne’e duni atu garante progresu sira ne’e hotu buka haka’as aan nafatin hodi mantein ekipa ho nune’e bele lori susesu ba ekipa rua ne’e,” konklui Ministra Dulce de Jesus Soares.

Notísia relevante:GNTL Sei Garante Segredu Matéria Ezame Nasionál

 Jornalista : Tomé Amado

Editór       : Rafy Belo 

HAKEREK NO HATÁN

Please enter your comment!
Please enter your name here