Diretór GNTL, Jaime Correia. Foto TATOLI: Tomé Amado

DILI, 02 setembru 2019 (TATOLI)-Diretór Gráfika Nasionál Timor- Leste (GNTL), Jaime Correia garante ba Ministériu Edukasaun Juventude no Desportu (MEJD) katak ninia parte nafatin garante segredu matéria ezame nasionál ne’ebé sei prodús ba estudante sira.

Garantia ne’e diretór GNTL bazeia ba esperiénsia ne’ebé sira hasoru datoluk ona liuhusi prosesu imprime boletin votu ba Eleisaun Prezidensiál, Eleisaun Parlamentár no Eleisaun Antesipada.

“Lala’ok impresaun ne’e kuaze hanesan laiha diferensa maibé iha mudansa de’it mak parte seguransa nian tanba uluk ami uza PNTL no agora ami uza Seguransa Sívil,” hateten Diretór Jaime Correia ba MEJD, iha edifísiu GNTL, Colmera, segunda (02/09/2019).

Nia haktuir, iha prosesu impresaun boletin votu nian ne’ebé liu ona funsionáriu sira ne’ebé toma konta ba produsaun la iha ida mak fila ba uma durante fulan tomak. Maibé, kona-ba produsaun matéria ezame nasionál nian funsionáriu sira serbisu oras 12 de’it.

“Sira sei hahú serbisu husi tuku 8 dader to’o fali tuku 8 kalan. Funsionáriu sira molok atu tama ka fila obrigasaun sei hetan pasa revista husi seguransa sívil sira,” informa diretór GNTL.

Ne’e duni seguransa hotu GNTL nian sei toma responsabilidade ba Diresaun Nasionál Protesaun Sivíl (DNPS) nian. Hahú husi aredór GNTL nia to’o iha edifísiu laran. “Funsionáriu ne’ebé de’it mak atu asesu ba GNTL laran tenke kumpre regra,” friza lider másimu GNTL, Jaime Correia.

Tuir nia katak sistema pasa revista ba funsionáriu GNTL nian sei halo manuál de’it tanba ekipamentu, aparellu ne’ebé GNTL iha bele deteta de’it sasán kro’at sira maibé kona-ba aparellu atu deteta surat-tahan sira laiha. Ne’e duni husi desizaun enkontru, parte seguransa nian rekomenda  aumenta tan seguransa sivíl feto ida atu bele  halo kontrola ka pasa revista ba feto maluk sira.

“Ha’u iha esperansa katak konfiansa ne’ebé mak Ministériu Edukasaun mai ami buat hotu sei la’o di’ak. Ha’u fiar katak durasaun tempu fulan ida ne’e ami sei finaliza ho di’ak no susesu atu nune’e ita-nia oan sira bele tuir ezame ho garantidu,” kompromete diretór ne’e.

Nia kompromete mós, sei kontinua kuida imajen GNTL nian hodi tane aas dignidade instituisaun estadu nian atu bele hetan nafatin konfiansa. Tan ne’e, husi prosesu produsaun ka imprime matéria ezame ba estudante sira, nia haktuir katak hatuur ona regra ka regulamentu interna ba funsionáriu sira ne’ebé hetan fiar iha GNTL nia laran no nia husu funsionáriu sira atu kumpre regra sira ne’e hodi lori susesu ba GNTL.

Notísia relevante:Estudante 53,101 Sei Partisipa Ezame Nasionál  

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here