Prezidente Autoridade Munisipál Dili, Gaspar Soares

DILI, 2 setembru 2019 (TATOLI) – Prezidente Autoridade Munisipál Díli, Gaspar Soares, diskorda ho matéria ne’ebé prepara hosi Komisaun Funsaun Públika (KFP) iha prosesu teste promosaun grau funsionáriu públiku.

Gaspar la konkorda liliu sira ne’ebé ho grau B ba A, mesak diretór nasionál, diretór jerál ho pozisaun altu iha governu.

Tanba ne’e, nia dehan, ema ho nível hanesan ne’e, KFP labele fó fali matéria jerál liu no tuir loloos tenke haree ema ninia vizaun ba problema ida.

Lee mós: KFP Promove Grau Funsionáriu Públiku Liuhusi Teste Eletróniku

Tuir Gaspar nia haree katak matéria sira ne’ebé iha, KFP prepara fali matéria báziku ne’ebé antes ne’e iha ona bainhira tuir teste primeiru hodi konkore ba funsionáriu públiku no agora hetan fali.

Nia fó sujestaun katak, tuir loloos, sira ne’ebé hosi Ministériu Negósiu Estranjeiru no Kooperasaun fó kona-ba sira-nia área hanesan diplomasia, sira hosi Ministériu Agrikultura no Peska fó kona-ba sira-nia área, nune’e mós hanesan sira hosi Ministériu Administrasaun Estatal tenke fó kona-ba administrasaun nian atu bele domina kona-ba área ida ne’e. Ho ida ne’e mak bele sukat ema ninia kapasidade liliu ema ida ninia méritu iha área ne’ebé nia serbisu ba.

Maski la konkorda ho matéria, maibé Prezidente Autoridade ne’e mós rekoñese katak sistema teste eletrónika ne’e buat foun no di’ak duni hanesan prosesu ne’ebé fair. Signifika, sistema ne’e labele halo manipulasaun, katak, sé mak hatene nia mak hetan valór di’ak no sé mak la hatene labele hetan valór di’ak.

Kona-ba kestaun ne’e, Komisáriu Komisaun Funsaun Públika, José Telo Soares Critóvão, hateten Administrasaun Públika iha rejime rua. Ida mak rejime jerál no ida seluk rejime espesiál.

Kona-ba rejime espesiál, José dehan, sei fó matéria ka pergunta ho karáter ka konteúdu rejime espesiál nian.
Oras ne’e dadaun, haree ba karáter konteúdu rejime jerál nian, tanba ne’e hotu hotu foka liubá rejime jerál ne’ebé kompete.

Nia hatutan, KFP la haree ba diplomata, agrikultór ka ida ne’e ka ida ne’ebá, maibe kualker funsionáriu ne’ebé hola parte iha rejime jerál ne’e pergunta hanesan dei’t.

“Matéria ne’e laiha matéria báziku, tanba ne’e konteúdu ida-idak nian”, hateten José iha eis Casa Europeia, Dili, ohin.

Nia esplika, grau B ba A ninia natureza pergunta ka pezu pergunta la hanesan ho grau C ba B, nune’e mós grau sira seluk.

Teste ba promosaun grau funsionáriu públiku ne’e hahú ona iha inísiu agostu liubá no tuir planu, teste ne’e sei termina iha rohan hosi setembru ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here