Xefe Departamentu Sinál no Tráfiku Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva.

DILI, 02 setembru 2019 (TATOLI)-Xefe Departamentu Sinál no Tráfiku Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva, hatete sei koordena ho Polísia Tránzitu hodi koloka pesoál, nune’e bele halo kontrolu ida ne’ebé másimu iha ponte foun B.J. Habibie.

“Iha tempu badak ami sei halo enkontru ho PNTL liuliu unidade Polísia Tránzitu no ha’u rasik maka sei ko’alia ho sira maizumenus bele tau tránzitu na’in-rua iha ponte B.J. Habibie para bele halo kontrolu, nune’e labele halo engarrafamentu no asidente iha fatin ne’ebá “, João afirma ba Tatoli iha Balidi, ohin.

João Eugénio rekoñese katak iha kondutór no motorista balun ladauk hatene no la kumpre sinál tránzitu sira ne’ebé maka DNTT monta ona. Hanesan balun bá para fali motór no karreta iha ponte leten.

“La kumpre sinál tránzitu ida ne’e la buat ida tanba ponte ne’e foun, komu entuziazmu ita nian komunidade sira tanba iha jardín mós, maibé ami sei foti medida”, katak.

Nia relata, hanesan mós uluk iha ponte foun CPLP no ponte Komoro III, maibé ikus mai DNTT foti medida nune’e motorista no kondutór sira kumpre ona.

“Atividade ne’e to’o 20 setembru, bainhira ita nian bainaka sira fila hotu DNTT ho polísia sei haree ida ne’e”.

Aléinde ne’e, João Eugénio mós informa sei reativa fali auto stop (check point) depois selebrasaun 20 setembru Misaun INTERFET (Forsa Internasionál ba Timor-Leste) nian.

Nia hatutan objetivu husi auto stop ne’e atu kontinua kontrola viatura sira tanba karreta balun oras ne’e kondisaun aat, maibé sei bá-mai.

“Tanba ne’e ami sei haree hodi check KIR karreta ne’e sei moris ka lae, nune’e mós check karta kondusaun sira tanba dala barak motorista balun la kumpre ida ne’e bainhira hetan polísia sira halai subar tiha”, Joao Eugénio haktuir.

Ho kestaun sira ne’e maka obriga DNTT no Polísia Tránzitu atu hahú hamutuk filafali halo operasaun atu eduka motorista sira nune’e sira bele iha konsiénsia atu kumpre bainhira lori karreta no motór.

Ponte B.J. Habibie inaugura iha 29 agostu husi eis Prezidente Repúblika no Premiadu Nobel Dame nian, Ramos Horta ho Ministru Obra Públika no Abitasaun Indonézia, Mochamad Basuki Hadimuljono.

Notísia relevante : DNTT Autoriza Diresaun Rua ba Viatura Sira Movimenta Iha Ponte B.J. Habibie

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here