Ponte ho Jardín B.J. Habibie iha faze finál. Imajen/ Osória A. Marques

DILI, 29 agostu 2019 (TATOLI)-Xefe Departamentu Sinál Tráfiku husi Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva, informa hafoin inaugurasaun ba ponte B.J. Habibie, DNTT foti ona desizaun hodi regula diresaun ka sentidu rua ba ponte foun ne’e hodi autoriza viatura sira halo movimentu.

“Ponte foun B.J. Habibie husi DNTT autoriza diresaun rua (dua jalur) ba karreta sira bele bá mai supermerkadu Lita Store no Otél Novu Turizmu nian”, dehan Eugénio ba jornalista Tatoli iha Balidi, ohin.

Entretantu, transporte sira ne’ebé liu husi ponte antigu ne’ebé daudaun mikrolete 04 halo operasaun bá-mai, tenke fila bá karuk no diretamente bá Bidau Akadiru-Hun no labele mai direta iha diresaun supermerkadu Lita Store no Otél Novu Turizmu nian, tanba regula ona tuir sinál ne’ebé kompañia monta bazeia ba desizaun DNTT nian.

João Eugénio salienta ba transporte liuliu mikrolete ne’ebé maka sei halai liuhusi ponte foun ne’e mak mikrolete 012 ne’ebé halo operasaun Lesidere bá areia branka nian. Enkuantu, ponte tuan Bidau Santa Ana ne’e mikrolete 04 maka liu husi ne’ebá no nia labele liu husi ponte foun B.J. Habibie.

Tanba ne’e, nia husu ba transporte boot sira hanesan kontentór, prevene no labele halai liu husi ponte tuan ne’ebé agora sai nu’udar diresaun 04 no permite de’it ba transporte ki’ik tanba ponte ne’e labele aguenta, tuan liu ona no kuandu karreta boot sira liu bele fó impaktu ba ponte ne’e.

“Ami (DNTT) husu ba transporte boot sira bele uza ponte foun B.J. Habibie tanba ami autoriza diresaun rua bele bá-mai hafoin Governu halo inaugurasaun”, Joao Eugenio da Silva afirma.

Ponte B.J. Habibie sei inaugura iha 29 agostu 2019, iha tuku 16.30 loraik ne’e.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here