Ministru Obra Públika no Abitasaun Públika Indonézia, Basuki Hadimuljono (karuk) ho Ministru Obra Públika, Salvador Eugénio Soares dos Reis Pires (loos) ko'alia kona-ba Kooperasaun Timor-Leste ho Indonézia. Imajen/TATOLI.

DILI, 31 agostu 2019 (TATOLI)- Ministru Obra Públika no Abitasaun Indonézia, Mochamad Basuki Hadimuljono, hatete Governu Indonézia prontu apoia Governu Timor-Leste ba planu abitasaun ka konstrui bairru foun ba abitante sira iha Timor-Leste.

“Programa ba Dezenvolvimentu  abitasaun ka konstrui bairru foun, ne’e  ami  prontu apoia liuhosi asisténsia téknika ka ekipa espesialidade abitasaun mai Timor-Leste atu apoia programa ne’e bainhira de’it Governu husu”, Ministru Mochamad Basuki Hadimuljono afirma iha Novu Turizmu, Lesidere, ohin, bainhira hasoru Ministru Obra Públika, Salvador Eugénio Soares dos Reis Pires.

Ministru Obra Publika no Abitasaun Indonézia dehan prontu nafatin hametin kooperasaun iha setór hotu-hotu hodi Timor-Leste bele dezenvolve liután.

“Ita kontinua hametin kooperasaun liuliu iha programa abitasaun ne’ebé ami sei diskute kle’an entre Embaixadór Indonézia iha Timor-Leste no Governu  Timor-Leste, maibé ami prontu para apoia”, katak.

Iha fatin hanesan, ministru Salvadór Eugénio Soares dos Reis Pires, dehan  enkontru bilaterál ho Ministru Obra Públika Indonézia ne’e husu atu fó asisténsia téknika ba planu Oitavu Governu nia atu konstrui abitasaun ka bairru foun ba abintante sira iha Timor-Leste liuliu kapitál Dili.

“Ami ko’alia uitoan kooperasaun bilaterál kona-ba apoiu asisténsia téknika halo planeamentu ba projetu sira hanesan abitasaun ne’ebé ita planu atu halo”, katak.

Antes ne’e, Governu halo ona estudu pre-viabilidade ne’ebé finaliza ona  no atu kontinua ba faze estudu viabilidade atu haree no estudu kona ba impaktu sósiu-ekonómiku área trajetu ne’ebé hela iha bairru kobre sira ne’e atu muda ba abitasaun foun.

Ministériu Justisa (MJ) liuhosi Sekretáriu Estadu Terras no Propriedades liberta ona rai iha Bekora área Asrama 744 nia ho etaré 6.4,  no ba área seluk hanesan Hali Dolar, Hera ho Komoro ho etare 25-resin ne’ebé iha faze identifikasaun ne’ebé trajetu halo uma unidade 2000 to’o 4000. Ba implementasaun sei uza sistema projetu Parseria Públiku Privada (PPP).

Pograma Oitavu Governu Konstitusionál fó prioridade ba revitalizasaun no abitasaun komunitária ho baze ba vizaun Planu Estratéjiku Dezenvolvimentu Nasionál (PEDN) no Objetivu Dezenvolvimentu Sustentavel (ODS)  atu asegura povu asesu ba rai, uma ne’ebé mak dignu no asesu ba infraesturura bázika sira hanesan bee-moos, elestrisidade no saneamentu.

Notísia relevante : SETP Liberta ona Rai iha Área Bekora Konstrui Bairru Foun

Jornalista : Florencio Miranda Ximenes

Editora : Maria Auxiliadora 

HAKEREK NO HATÁN

Please enter your comment!
Please enter your name here