Sekretáriu Estadu Terras no Propriedades Mário Ximenes. Imajen António Goncalves.

DILI, 24 agostu 2019 (TATOLI)-Sekretáriu Estadu Terras no Propriedade (SETP), Mário Ximenes, hatete ekipa rai no propriedade hala’o ona identifikasaun no levantamentu iha área tolu hanesan Hali Dólar-Hera, Komoro no eis Asrama 744 iha Bekora atu konstrui bairru foun.

“Rai iha área Bekora, fatin eis 744 nian ne’e ofisiálmente ita liberta no atribui ona ba iha Ministériu Obra Públika (MOP) atu hala’o kontinuasaun ba programa halo bairru foun”, Sekretáriu Estadu ba jornalista sira iha Palásiu Governu, ohin.

Ba fatin rua seluk iha área Hali Dólar-Hera no merkadu Komoro, Munisípiu Dili nian, MOP no Ministériu Justisa hala’o hela identifika no levantamentu dadus.

“Fatin rua ne’e sei iha faze identifikasaun ne’ebé ita liberta fó ba Ministériu Obra Públika atu konstrui bairru foun atu ita tau komunidade afetadu sira área Tasi-Tolu, aeroportu nian no komunidade iha mota ninin sira atu ita halo sidade ne’e ho di’ak”, katak nia.

Antes ne’e, Ministru Obra Públika, Salvador Eugénio Soares dos Reis Pires, dehan gabinete MOP ho Diresaun Jerál Abitasaun no Planu Urbanu (DGHPU, sigla portugés) hahú  diskute ho Prezidente Autoridade Munisipál Dili, Gaspar Soares, hodi ko’alia kona-ba envolvimentu munisípiu nian iha prosesu libertasaun parsela rai Hera no Kulau.

Ministru Salvadór dehan parsela rai ne’e, tékniku MOP hamutuk ho parte Ministériu Justisa (MJ) no autoridade lokál sira identifika ona iha área tolu mak iha parte Komoro, Kulau no Hera atu sai fatin ba abitasaun komunitária.

“Ita servisu hamutuk ho Ministériu Justisa atu fó rai iha Bekora no Komoro ho ektare 6.4  no Hera  ho ektare 25-resin ho trajetu mak halo uma 2000 to’o 4000”, katak.

Ba parsela sira ne’e, MOP simu ona despaxu atribuisaun rai husi MJ ho númeru referénsia 1537/G-MJ/07/2019 ho númeru komunikasaun 31/07/2019, iha loron 05 agostu 2019.

Oitavu Governu mós finaliza ona estudu pré-viabilidade, ne’ebé atu kontinua ba faze estudu viabilidade atu haree no estudu kona-ba impaktu sósiu-ekonómiku área trajetu ne’ebé hela iha bairru kobre sira ne’e atu muda ba abitasaun foun.

Ba implementasaun, ministru dehan, sei uza sistema projetu Parseria Públika Privada (PPP) ne’ebé enkoraja ba setór privadu atu investe.

Programa Oitavu Governu Konstitusionál fó prioridade ba revitalizasaun no abilitasaun komunitáriu tanba ho vizaun revitaliza atu asegura povu asesu ba rai, uma ne’ebé mak dignu no asesu ba infraestrutura bázika sira hanesan bee-moos, eletrisidade no saneamentu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here