Estudande no joventudi sira lori bandeira nasional uainhira partisipa iha aniversariu FALINTIL ba dala 44 iha Kuartel Jeral Fatuhada Dili 20 Agostu 2019.Imajen/TATOLI

DILI, 29 agostu 2019 (TATOLI)-Moderadór Igreja Protestante iha Timor- Leste, Pastór Lourenço dos Santos hateten katak iha tinan 24, lider rezisténsia sira hatudu sira-nia maturidade polítika, rona malu no fiar ba malu hodi organiza prosesu luta hasoru kolonializmu to’o alkansa objetivu ba ukun rasik aan.

Maibé, ohin loron Timor-Leste tama ona prosesu rekonstrusaun no dezenvolvimentu estadu ba tinan 20 ida ne’e lider polítiku la fó liman ba malu, hatún malu lakon konfiansa ba malu.

“Ita presiza unidade nasionál ne’ebé uluk sira (lider sira) kria ba povu timoroan hotu hodi hamutuk hasoru invazór sira tenke haburas nafatin maibé iha realidade unidade ne’e lakon ba daudaun”, hateten Pastór, Lourenço dos Santos ba Jornalista Ajénsia TATOLI iha igreja Protestante Hosana, Vila Verde, kinta (29/08/2019).

Pastór Lourenço hateten, iha tempu susar maske laiha osan, laiha hahán ema timoroan hotu husi lider sira to’o povu ki’ik metin no unidade. Depois ukun aan maske progresu barak akontese iha prosesu konstrusaun estadu maibé progresu ida loloos seidauk hetan tanba lider sira fahe malu.

“Ha’u hanoin to’o tempu ita tenke hamoris fali prosesu rekonsiliasaun iha rai laran no mós rai li’ur atu nune’e bele hadame fali ema timoroan sira liu-liu ita-nia ukun na’in sira atu bele hamutuk hodi tau-matan fali ba povu sira iha área rurál”.

Razaun fundamentál ida, tuir pastor ne’e, mak presiza lider polítiku sira konsidera katak povu kbiit laek sira ne’ebé uluk fó ona sira-nia moris tomak hodi kontribui ba luta ukun rasik aan ne’e barak mak sei terus, oinsá atu rezolve sira nia problema tanba prosesu luta to’o hetan ukun rasik aan ne’e ema hotu ninia kontribuisaun.

“Ne’e duni nu’udar ema relijiozu presiza de’it nasaun ne’e atu moris hakmatek para povu bele hetan moris di’ak,” nia konklui.

Notísia relevante:“Espíritu Referendu Mak Rekonsiliasaun”

Jornalista : Tomé Amado

Editór       : Rafy Belo 

HAKEREK NO HATÁN

Please enter your comment!
Please enter your name here