Bispu Dioseze Dili, Don Virgílio do Carmo da Silva. Imajen/TATOLI.

DILI, 29 agostu 2019 (TATOLI) – Amu Bispu Dioseze Dili, Don Virgilio do Carmo da Silva, husu ba timoroan hotu atu haburas rekonsiliasaun nu’udar espíritu ida hodi hametin unidade ba apoiu prosesu dezenvolvimentu.

“Espíritu referendu nian maka rekonsiliasaun,  liuhosi dalan ne’e maka bele kore fukun sira ne’ebé sei kesi hela hodi prepara hakat ba unidade ida metin liután”, amu bispu hatete iha ninia omilia durante misa selebrasaun referendu ba dala 20 iha igreja Katedrál.

Lider Igreja Katólika Dioseze Dili ne’e mós propoin atu haburas rekonsiliasaun iha kultura no prátika moris loron-loron nian, tanba dame malu maka hanorin povu hatene haraik án, perdua no simu malu hodi hametion no haburas liután unidade ba aselera dezenvolvimentu.

“Foti matan  haree ba ita nia eroi sira,  mai ita kuda iha ita nia fuan, espíritu unidade, sakrifísiu nian”, tenik.

Tuir nia, prátika rekonsiliasaun ne’e tenke hahú husi nivel aas Estadu nian to’o nivel ki’ik iha baze, nune’e hetan solusaun bainhira mosu dezentendimentu iha sosiedade.

Bainhira Timoroan lakohi mantein no haburas rekonsiliasaun, nia dehan sei fó impaktu ba instabilidade, tanba laiha ona unidade.

Durante omilia, Dom Virgílio aproveita oportunidade ne’e hodi apela ba timoroan hotu atu tau responsabilidade partense hodi uza sasan Estadu nian, tanba tuir Bispu ninia observasaun akontese povu balun estraga sasan Estadu depois ezije Governu rezolve hodi hadi’a ho lalais.

“Ezemplu sasan Estadu nian dala barak ita uza arbiru de’it,  ho hakat tan istória foun konvida ita hotu atu haree kona-ba asuntu ne’e”, informa Bispu Dili.

Entrantu, misa ohin partisipa husi Bispu Eméritu Melbourne Austrália, Reprezentante Santa sé, Monseñor, Marco Sprizzi.

Orgaun soberanu hanesan, Prezidente Parlamentu Nasionál, Arão Noe, Prezidente Tribunál Rekúrsu, Deolindo dos Santos, Espoza Prezidente Repúblika, Cidália Nobre Mouzinho Guterres, Espoza Primeiru Ministru, Isabel Ferreira, Ministru Justisa, Manuel Carcéres da Costa.

Alende ne’e, Ministru Obra Públika, Salvador Eugénio Soares dos Reis Pires, Vise-Ministru Obra Públika, Nicolau Lino Freitas Belo, Vise Ministra Solidaridade Sosiál no Inkluzaun (MSSI), Signi Chandrawati Verdial, Sekretáriu Estadu Komunikasaun Sosiál (SEKOM), Mericío Juvinál dos Reis Akara, Sekretáriu Estadu Kooperativa (SEKoop), Arsénio da Silva Pereira, Korpu Diplomátiku, Estudante Ensinu Báziku, Sekundáriu,  Universitáriu, Funsionáriu Públiku no seluk tan.

Jornalista: Agapito dos Santos

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here