Komunidade Xineza iha Timor-Leste hala'o serimónia Sambaia hodi selebra loron Konsulta Populár. Foto: Felicidade Ximenes

DILI, 29 agostu 2019 (TATOLI) – Komunidade Xineza iha Timor-Leste hala’o serimónia Sambaia hodi selebra loron Konsulta Populár ba tinan 20 no Misaun INTERFET (International Forces In East Timor) ho tema “Husi Akudesan ba Rekonsiliasaun, Rekonstrusaun no Dezenvolvimentu Nasionál ba tinan 1999- 2019

Prezidente Asosiasaun Komersiál Komunidade Xineza Timoroan (AKKXT-sigla portugés), Kathleen Gonçalves hateten, timoroan hothotu atu selebra loron aniversáriu ba loron referendu nian, loron istóriku no loron ne’ebé timoroan deside nia destinu iha Timor-Leste iha tinan 20 liubá.

Prezidente Asosiasaun Komersiál Komunidade Xineza Timoroan, Kathleen Gonçalves. Foto TATOLI: Felicidade Ximenes

“Komunidade xineza timoroan mai iha Timór, ohin, halo ona 107 anos. Iha prosesu referendu hirak ne’e, sira barak mak partisipa no maluk xineza barak mak lakon sira-nia vida ba rai ida ne’e no ami mós harii ona monumentu ida iha ne’e hanaran Xina Rate Taibesi no tinan-tinan, loron matebian nian ami sempre halo Sambaia hodi husu Maromak nia tulun,” hateten Prezidente AKKXT, Kathleen Gonçalves ba mídia hafoin Sambaia, iha Xina Maromak, Bairru Formoza, Ohin.

Nia konsidera katak hafoin tinan 20 liu, dezenvolvimentu iha Timór nia progresu la’o neneik maibé la’o di’ak. “Tinan-tinan governu ezekuta ninia osan no governu iha ninia planu ba iha Timór ida ne’e, atu dezenvolve ba rai ida ne’e liuhusi nia prioridade hodi kontinua la’o no ami nafatin fiar katak Timor-Leste sei dezenvolve ba oin ho di’ak,” tenik prezidente AKKXT.

Nia dehan, AKKXT hamriik iha sosiedade nia leet atu sai parseiru ida di’ak ba ita-nia governu no estadu hodi fasilita komunidade tomak no mai prontu atu sai parseiru dezenvolvimentu liuliu iha ekonomia, dezenvolvimentu, iha rai laran.

Iha fatin hanesan, reprezentante Governu, Vise-Ministru Dezenvolvimentu Estratéjiku Saúde, Bonifácio Maukoli dos Reis hateten, iha 30 agostu liubá timoroan tomak, la haree ba nia relijiaun no la haree ba nia rasa maibé hotu ho objetivu ida de’it maibé oinsá mak bele determina futuru Timor-Leste nian.

Nu’udar ita hotu hatene katak iha tempu hothotu iha difisil maske iha ameasa iha intimidasaun maibé hothotu hakat ba iha urna hodi nune’e bele determina hodi hakotu lalais susar no terus ne’ebé mak povu timoroan tomak terus iha momentu ne’ebá.

“Hanesan vise-ministru saúde no Ministru Interinu hetan fiar husi Primeiru-Ministru hodi mai partisipa serimónia Sambaia ida ne’e hodi selebra hamutuk liuhusi reza oioin hodi husu tulun liuliu hametin unidade oinsá ho unidade ida ne’e bele hamutuk hodi dezenvolve Timor-Leste ne’ebé di’ak liu ba oin,” dehan governante ne’e.

“Iha relijiaun hothotu nia hamulak oioin maibé ita ema umanu oinsá atu haraik nafatin tulun, haraik nafatin forsa espiritu hodi bele hasoru tan dezafiu ne’ebé mak sei mai dezafiu ne’e mak oinsá ita atu luta hasoru ki’ak no mukit,” reforsa tan Vise-ministru Saúde, Bonifácio Maukoli .

Entretantu, partisipa iha serimónia Sambaia, ohin, alende Vise-Ministru Dezenvolvimentu Estratéjiku Saúde, Bonifácio Maukoli, reprezentante Prezidente Repúblika, Zélia Fernandes no mós reprezentante Xina timoroan sira, Francisco Kalbuady Lay no mós budista sira seluk.

Iha atividade Sambaia ne’e, Jornalista Ajénsia TATOLI mós observa katak komunidade xineza sira kompostu husi labarik ki’ik, feto no mane, ferik no katuas ida-idak kaer ai-kesak ki’ik ida hodi sunu iha ai-kesak boot hodi hakru’uk dala tolu ba ai-kesak boot atu husu harohan ba Maromak. Katak, sunu ai-kesak ki’ik ida hodi ba hakru’uk dala tolu iha ai-kesak boot nu’udar kultura xineza nian, husu harohan ba Maromak fó grasa no saúde di’ak ba povu no rai.

Notísia relevante:Unidade Nasionál Tenke Haburas Nafatin  

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here