Komunidade Indú iha Timor-Leste, ohin, reza hamutuk iha Pura Giri Natha Taibesi, Dili. Foto/Antónia Gusmão.

DILI, 29 agostu 2019 (TATOLI)-Xefe Komunidade Indú iha Timor-Leste, Budi, hatete komunidade Indú prontu reza ba Timór hodi kontinua dezenvolve bá oin.

“Ami reza ba Timor-Leste. Iha ami-nia orasaun ami sei la haluha temi Timór hodi atinje ninia mehi hodi haree didi’ak ninia povu no espera Maromak haraik bensaun no fó dame ba ita hotu liuhosi orasaun ne’ebé hasa’e”, Budi afirma iha ninia intervensaun hafoin reza hamutuk ne’ebé hetan prezensa husi Ministru Agrikultura no Peska, Joaquim José Gusmão dos Reis Martins, iha Pura Giri Natha, Taibesi, ohin.

Líder relijiaun Indú ne’e salienta, nu’udar povu baibain hosi nasaun viziña Indonézia sempre apoia Timor-Leste iha aspetu saida de’it, maibé relasaun ho polítika ne’e depende ba na’i-ulun nasaun hosi rai rua ne’e nian.

Iha parte seluk, Xefe Komunidade Indú ne’e apresia tebes ho tema ba aniversáriu ba dala-20 Loron Konsulta Populár (1999-2019) no Misaun INTERFET (20 setembru 1999-20 setembru 2019), “Das Cinzas à Reconciliação, Reconstrução e Desenvolvimento Nacional”. Tanba hosi tema ne’e refleta progresu dezenvolvimentu iha nasaun ne’e nian no hosi tema ne’e realidade duni katak, dezenvolvimentu iha Timór hatudu progresu ne’ebé di’ak.

Komunidade Indú iha Timor-Leste, ohin, reza hamutuk iha Pura Giri Natha Taibesi, Dili, iha ámbitu komemorasaun tinan 20 Loron Konsulta Populár no Misaun INTERFET (Forsa Internasionál ba Timor-Leste).

Atividade reza hamutuk ne’e hahú iha tuku 08:00 dadeer no hetan prezensa husi Ministru Agrikultura no Peska, Joaquim José Gusmão dos Reis Martins.

Notísia relevante : Komunidade Indú Iha TL Reza Hamutuk Hodi Husu Tulun Iha Komemorasaun Tinan 20 Konsulta Populár

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here