Komunidade Indú iha Timor-Leste, ohin, reza hamutuk iha Pura Giri Natha Taibesi, Dili. Foto/Antónia Gusmão.

DILI, 29 agostu 2019 (TATOLI)-Komunidade Indú iha Timor-Leste (TL), ohin, reza hamutuk iha Pura Giri Natha Taibesi, Dili, hodi komemora tinan 20 Loron Konsulta Populár no Misaun INTERFET (Forsa Internasionál ba Timor-Leste).

Atividade reza hamutuk ne’e hahú iha tuku 08:00 dadeer no hetan prezensa husi Ministru Agrikultura no Peska, Joaquim José Gusmão dos Reis Martins, ho funsionáriu balu ne’ebé prezente oras ida antes reza hamutuk.

Ministru Joaquim José Gusmão dos Reis Martins, marka prezensa iha Puri Giri Natha hodi reza hamutuk ho Komunidade Indú. Foto/Antónia Gusmão.

Ministru Joaquim José Gusmão dos Reis Martins, marka prezensa iha Puri Giri Natha tanba simu orientasaun husi Primeiru-Ministru (PM), Taur Matan Ruak, liuhusi reuniaun Konsellu Ministru estraordinária, tersa ne’e, hodi reza hamutuk ho komunidade Hindu iha Timor-Leste.

“Orgullu tanba bele partisipa reza hamutuk. Ida ne’e, inisiativa hosi komisaun organizadora ba eventu aniversáriu 20 Loron Konsulta Populár nian. Komisaun realiza reza ida ba relijiaun hotu iha Timór, reza hodi husu tulun nafatin hodi komemora loron importante ne’e”, Ministru Joaquim hatete hafoin reza hamutuk.

Governante ne’e observa katak komunidade Indú entuziazmu tebes hodi partisipa iha atividade ne’e, hodi apoia orasaun ba povu Timor-Leste.

“Ha’u haree atividade reza hamutuk ne’e pozitivu tebetebes, tanba komunidade Indú konsege organiza sira nia-aan tanba la’ós de’it komunidade hosi Indonézia liuliu Bali, maibé organiza komunidade Indú sira husi nasaun seluk hanesan Índia, Nepál no seluk tan, sira mai reza hamutuk iha ne’e hodi reza ba ita-nia nasaun”, Joaquim afirma.

Budi, Xefe Komunidade Indú iha Timor-Leste, orgullu tebes ho Estadu Timor-Leste tanba bele realiza reza hamutuk ne’e.

Nia relata katak simu informasaun hosi komisaun organizadora iha jullu no momentu ne’ebá realiza kedas enkontru hamutuk ho komunidade Indú sira iha Timór no partisipa mós reuniaun ida hamutuk ho komisaun organizadora ba aniversáriu ba dala-20 Loron Konsulta Populár no Misaun INTERFET.

“Ami sente orgullu tebes tanba iha rekoñesimentu hosi Estadu Timor-Leste ba ami komunidade Indú iha Timór, no hosi atividade ne’e ami sei halo buat ne’ebé di’ak liután ba Timór, liuliu ba povu”, Budi promete.

Iha reza hamutuk ne’e, Xefe komunidade Indú nian konvida Ministru Joaquim hodi fó bensaun tuir sira-nia relijiaun no ikus taka atividade ne’e ho foto hamutuk.

Iha ámbitu komemorasaun ba loron istóriku Timor-Leste nian ne’e, konfisaun relijioza prinsipál lima iha Timor-Leste, iha loron 29 agostu, realiza mós selebrasaun relijioza  ne’ebé mak konta mós ho prezensa husi membru VIII Governu.

Selebrasaun Katólika, hala’o iha Igreja Katedrál, Dili no konta ho prezensa husi Ministru Justisa, selebrasaun Protestante hala’o iha Igreja Osana no konta ho prezensa husi Ministra Edukasaun Juventude no Desportu, no Ministru Obra Públika  akompaña serimónia Musulmanu iha Meskita An-Nur, selebrasaun iha Templu Budista akompaña husi Vise-Ministru ba Dezenvolvimentu Estratéjiku Saúde no ikus liu, serimónia Indú, iha templu Pura Giri Natha no konta ho prezensa husi Ministru Agrikultura no Peska.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here