DILI, 27 agostu 2019 (TATOLI)—Koordenadora Grupu Tais Adimean husi Munisípiu Manatutu, ohin, informa katak durante ne’e Manatutu koñesidu ho balisaun maibé Manatutu mós koñesidu ho tais orijinál Adimean ne’ebé dezde bei’ala sira husik hela.

Atu kualifika katak tais refere sai tais ne’e iha kualidade, bei’ala sira uza Ai-been Ai Mata-Bida hodi garante tais ne’e ninia kualidade.

Tais Adimean ne’e baibain lia-na’in sira uza iha serimónia kulturál uma-lulik nian. Tais ne’e tenke hatais ho kombinasaun lensu-mean kesi iha uluk, kompletu ho surik hafoin mak bele sa’e ba uma-lulik laran. Bainhira la hatais kompletu mak seidauk hetan lisensa atu tuur iha uma ho ahi.

“Husi kedas bei’ala sira, sira bandu ona Tais Ademean, lensu mean no surik labele uza arbiru iha kualkér eventu. Sasán kulturál sira ne’e iha ona ninia fatin atu uza. Loloos ne’e Tais Adimean laiha ninia valor místiku maibé Lensu mean ne’ebé kesi iha ulun ne’e mak iha ninia sansaun. Kuandu naran uza de’it, ema bele mate ka bulak,” dehan Kordenadora Grupu Tais Adimean, Aurora Barros Bento, ba Ajénsia TATOLI liuhusi entrevista iha Centro Convenções Dili (CCD), Merkadu Lama, Dili, tersa (27/08/2019).

Maske Tais Ademean no Lensu-Mean ne’e labele uza kuandu laiha lisensa, nia hatutan, grupu ne’e kontinua soru nafatin atu bele promove liután tais orijinal ne’e hodi bele hatudu no promove ba munisípiu sira seluk no mós ba mundu.

Nia esplika, kualidade Tais Adimean ne’e garante iha Ai-Been “Mata-Bida” ninia prosesu atu halo ne’e fasil tebes. Dahuluk, nono tiha Ai Mata-Bida kulit ne’e to’o nakali depois ninian been koor mean ona, fakar fali ba balde ida hafoin hatama kabas (putus). Hein to’o putus ne’e mean ona mak hasai fali mai, hoban fali ho tahu to’o maran depois mak fase moos fali.

“Kuandu ita fase ona mak kabas ne’e ninia rezultadu la metan entaun ita tenke hoban fila fali atu  bele hetan ninia rezultadu. Ida ne’e mak ita foin bele garante kualidade. Tanba putus metan ona, ba oin ita atu fase mós sei la kamutis,” nia hateten.

Ne’e duni, nia informa, iha eventu Festival Kultura Rezisténsia Popular ne’e, Manatutu mai ho ninia motif Tais Adimean hodi kompete iha ho munisípiu sira seluk hodi kompete iha Dili. Iha kompetisaun ne’e, munisípiu hotu garante sira-nia kualidade tais, sé mak di’ak liu nia mak sei hetan fatin.

“Ami mós mai ho preparasaun ida másimu maske kada grupu reprezenta ema na’in tolu de’it. Maibé sira mesak figura ne’ebé mak iha ona koñesimentu kona-ba prosesu halo ka soru tais ne’e,” Aurora esplika.

Entretantu, Grupu Tais Ademean husi Manatutu harii no eziste iha 2014. Maibé, to’o oras ne’e, sira-nia rezultadu soru tais ne’e kuaze sangar balun iha Timor-Leste no ajénsia Internasionál lubuk ida mak order ona sira-nia tais atu sosa.

Notísia relevante:Tais Metan, Tais Identidade Ermera Nian

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here