Tais metan

DILI, 26 agostu 2019 (TATOLI) – Grupu Indústria Tais husi Munisípiu Ermera promove tais metan hodi reprezenta identidade orijinál munisípiu ne’e nian. Tais metan ne’e kompostu husi Tais laku metan, Tais Metan Kase, Tais metan Bodato no Tais Metan Anarasi.

“Tais sira ne’e hotu uluk tempu avo sira nian, liurai feto no mane mak hatais. Agora Tais metan Anarasi ne’e úniku de’it fó hatais ba kuda kompletu ho kaebauk,” hateten Koodenadora grupu, Paulina Gomes ba jornalista TATOLI iha Sentru Konvensaun Dili (CCD-sigla portugés), segunda (26/08/2019).

Nia esplika, Tais Metan sira ne’e to’o agora mós sei rai nafatin iha uma lisan pertense ba Lemia leten no Atsabe, husi liurai dahuluk nian. Ne’e duni tais sira ne’e kuandu iha eventu serimónia sakrál mak foin bele uza maibé tenke liuhusi desizaun hamutuk atu fó fiar ba se mak bele uza.

Maibé nu’udar jerasaun foun ne’ebé hetan fiar husi uma lisan Gurubu Kotalau Darlau molok atu uza tenke hakru’uk uluk ba bandeira, krús, kaixaun no Tais ne’ebé atu uza; tais ne’e uza de’it ba serimónia rituál sira.

“Ha’u hanesan jerasaun ne’ebé hetan fiar, ha’u sei uza depois mak fó hatene ba reprezentante hotu husi Munisípiu Ermera tomak katak agora atu hamutuk hodi hasoru lia uma mane no uma feto”.

Husi Tais seluk ne’ebé mak jerasaun foun sira kontinua soru, tuir nia, hodi kontinua promove atu ninia valór místiku ne’e labele lakon. Maibé, Tais laran funan ne’e mós iha liurai dahuluk nian, avo sira uza bainhira ba halo to’os, hein udan been hodi kuda ai-han sira.

Maibé kuandu kuda hotu ona ai-han sira, avo sira la uza ona to’o tempu ai-han sira ne’e isin ona mak foin hatais fali hodi halo serimónia sau ba ai-han sira ne’e.

“Ami-nia avo sira hatais fali Tais Laran funan ne’e kompletu ho ulsukun, mortel no kaebauk hodi bidu, dahur no dadolin hodi agradese ba Maromak no ba rai lulik sira tanba bele fó nafatin ai-han moris ba nia oan sira,” haktuir Koodenadora grupu, Paulina Gomes.

Notísia relevante:Jerasaun Dom Boaventura Promove Tais Lulik “Kasto Mutin”

 Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here