Grupu Kialau husi Munisípiu Lautem. Foto TATOLI: Tomé Amado

DILI, 28 agostu 2019 (TATOLI)-Grupu Kialau husi Munisípiu Lautem promove Tais Sikalau ne’ebé Ratu Lautem hatais iha tempu beiala sira nian, iha Festivál Kultura Rezisténsia Populár (FKRP).

Tais Sikalau ka Tais metan ne’e iha tempu uluk la kualker ema ida bele hatais tanba beiala sira fahe ona tais sira ne’e ba kasta tolu: Kasta Ratu, Pacang no Akan. Ne’e duni, Tais Metan Sikalau ne’e Ratu de’it mak bele hatais.

Reprezentante Grupu Kialau husi Lautem, Luisa da Conceição hateten, iha mós Tais metan seluk maibé ninia motif labele hanesan ho Tais Sikalau. Ida ne’e reinu sira bele hatais.

Kuandu Tais Sikalau ne’e mak iha tempu beiala sira nian mak Reinobida mak hatais liurai Ferti Ratu ninia ema sira buka tuir kedas.

“Ema ne’e tenke hatán iha Ratu nia oin kona ba tais ne’ebé nia hatais ne’e no ema ne’e sei servi ba ratu ne’e tuir tempu ne’ebé determina,” haktuir Reprezentante Grupu Kialau, Luisa da Conceição ba jornalista Ajénsia TATOLI, iha Sentru Konvensaun Dili (CCD-sigla portugés), kuarta ne’e.

Tuir Luisa da Conceição, agora valór istóriku ne’e hahú mihis tanba tempu ukun aan ona, klase sira ne’e ladún eziste ona, tais Sikalau ne’e ema bele hatais iha kualker tempu.

Maibé agora valór istóriku ne’e hahú mihis tanba tempu ukun an ona klase sira ne’e la dun eziste ona. Tais Sikalau ne’e ema bele hatais iha kualker tempu.

Tanba depois bei’ala sira husik hela istória ida ho ninia klase jerasaun tuir mai ladún tane ona valór sira ne’e. “Entaun buat sira ne’e lakon no ohin loron Tais ne’e hahú prodús ka soru iha Lautem,” nia konsidera.

Luisa esplika, jerasaun foun sira iha parte ida la’ós la respeita maibé ho intensaun ida hakarak promove atu jerasaun tuir mai bele hatene nafatin motif sira ne’e, duke tais ne’e lakon ninia istória iha mundu ohin loron.

Tanba ne’e Grupu Kialau uza oportunidade iha Festivál Kultura Rezisténsia Populár (FKRP) atu hatudu ba munisípiu sira seluk katak Lautem mós iha ninia identidade kulturál no tais sira ne’e avo sira soru maibé la garante ninia kualidade. “Maibé ohin loron jerasaun Lautem komprende oinsá atu garante tais orijen ne’e ho ninia kualidade sira, tenke aprende liután ho sasán natureza sira ne’ebé iha”.

Nia esplika, ai husi natureza ne’ebé sira uza ba garante kualidade tais sira iha iha Lautem mak ho lian Fataluko, Pokura, malus tahan, bua no ahu.

Nia prosesu mak putus ka kabas ne’e tenke hoban iha ai-ben durante oras 24 nia laran depois mak hasai mai de’ut ho taho no depois habai to’o nia maran mak foin fase fali hodi hatene ninia kualidade. Kuandu kór sai entaun tenke hoban dala ida tan to’o kabas la kamutis.

“Ida ne’e mak prosesu ida ne’ebé grupu ne’e halo no rezultadu atu garante kualidade ba putus ne’e mak komisaun sira halo ona teste ba ai-ben ne’ebé uza,” hateten Reprezentante Grupu Kialau, Luisa da Conceição.

Grupu Kialau ne’e estabelese iha Lautem iha 2013 maibé to’o agora seidauk hetan apoiu ida husi governu. Durante ne’e tais ne’ebé sira prodús ne’e fa’an de’it ba komunidade sira iha Lautem.

Tan ne’e iha oportunidade ne’e, Reprezentante Grupu Kialau, Luisa da Conceição mós husu ba governu bele tau-matan ba sira hodi nune’e sira bele haluan tan produsaun ne’e ba rai seluk no agora daudaun sira iha ema na’in neen mak moris iha grupu laran hodi aselera nafatin prosesu sira ne’e.

Notísia relevante:Manatutu Garante Kualidade Tais Ademean ho Ai Mata-Bida Nia Been

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here