Ministru Reforma Lejizlativa no Asuntu Parlamentár no Ministru Turizmu, Komérsiu no Indústria interinu, Fidelis Manuel Leite Magalhães halo abertura ba Feira Gastronomia hodi koko hahán tradisionál, iha Sentru Konvensaun Dili (CCD). Tersa,(27/08/2019). Imajen/Tatoli.

DILI, 27 agostu 2019, (TATOLI)-Ministru Turizmu, Komérsiu no Indústria (MTKI) interinu, Fidelis Manuel Leite Magalhães, hatete sabór hahán Timor nian diferente tebes ho rai sira seluk.

Tanba ne’e atuál Ministru Reforma Lejizlativa no Asuntu Parlamentár (MRLAP) husu ba timoroan sira atu valoriza hahán tradisionál.

“Ohin, ita mai hamutuk iha ne’e ko’alia kona-ba gastronomia, ko’alia kona-ba ai-han. Ne’e buat ida ne’ebé ita hanoin baibain, maibé ne’e parte ida integrál husi ita-nia aan, tanba ita lahan, ita mate”, Ministru Fidelis dehan iha Sentru Konvensaun Dili (CCD-sigla portugés) iha ámbitu abertura Feira Gastronomia, ohin.

Governante ne’e afirma, uluk sosiedade hothotu iha mundu tantu portugés sira mós mai to’o iha Timór tanba ai-han, ne’ebé ai-han ne’e xave, ai-han ne’e fundamentál tebes.

“Ita aprende kona-ba sabór bainhira iha ita-nia kabun-laran, maibé ita sira ne’e dalaruma haluha tiha katak bainhira ita bá fatin-fatin dala barak ita haree sasán ita-nia kabeen tun de’it tanba haree hahán sabór Timór nian”, dehan Fidelis.

Ministru Koordenadór Asuntu Ekonómiku ein funsaun ne’e argumenta : “Ita-nia sabór ne’e diferente ho ita-nia maluk sira Indonézia, tanba sira-nia hahán maioria sabór manas, maibé ita nian manas uitoan más moruk mak liu no midar”.

“Más midar la’ós midar masin-midar, maibé midar oin seluk katak midar ida kahur ho sukaer, ida ne’e mak ita-nia identidade, ne’ebé ita sira iha ne’e ba haktuir ba ita-nia oan no bei-oan sira no aban-bainrua sira temi sira-nia aan hanesan timoroan karik sira temi katak Timór nia sabór ne’e ligadu ho Matebian, Kablaki, tasi Ataúru ne’e sabór ida, sabór ida ne’ebé mak só poezia de’it mak bele ko’alia, só múzika de’it, dala ruma ita ko’alia ba malu susar atu deskreve, dalaruma ema dehan sabór ida só klamar de’it mak hatene kakutak la koñese”, afirma Ministru Fidelis.

Notísia relevante : Ohin, Kompetisaun Hahán Lokál iha Feira Gastronomia

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here