Bainaka internasionál sira haree hela hahán lokál ne’ebé prepara husi munisípiu Ainaru. Foto/Antónia Gusmão.

DILI, 27 agostu 2019 (TATOLI)-Restaurante no Otél nasionál hamutuk 20 no maioria husi munisípiu, ohin, kompete iha Feira Gastronomia hodi komemora Loron Konsulta Populár ba dala-20 no Misaun INTERFET (Forsa Internasionál ba Timor-Leste).

Prezidente Komisaun Organizadora Feira Gastronomia husi Ministériu Turizmu, Komérsiu no Indústria (MTKI), Ernestina Lopes, hatete feira ne’e importante tebes no ida ne’e hanesan programa anuál MTKI nian hodi promove hahán Timor-Leste hodi sai produtu turístiku liuhosi produtu lokál nasaun nian.

“Objetivu prinsipál mak atu prezerva no promove produtu lokál no ai-han típiku ita-nia nasaun nian no hasa’e kriatividade no kapasidade hodi kria menu ai-han nian atu nune’e restaurante sira ki’ik no boot bele oferese ba ita-nia kliente liuliu ba ita-nia turista doméstika no internasionál”, Ernestina Lopes hatete iha abertura Feira Gastronomia ne’ebé realiza iha Sentru Konvensaun Dili (CCD, sigla portugés), ohin.

Bainhira ko’alia kona-ba turizmu la’ós prezerva de’it kultura, ambiente, foho no tasi maibé importante mós atu prezerva ho identifika gastronomia hanesan identidade nasaun nian.

Partisipante sira ne’ebé kompete iha feira ne’e, munisípiu Manufahi no Rejiaun Administrativa Espesiál Oekusi-Ambenu (RAEOA) maka la tuir.

Feira ne’e loke husi Ministru Turizmu, Komérsiu no Indústria interinu, Fidelis Manuel Leite Magalhães, no partsipa husi bainaka nasionál no internasionál, Komandante PNTL Munisípiu Dili Superintendente Xefe Armando Monteiro no seluk tan.

Hafoin abertura, partisipante sir akompaña juri no komisaun organizadora hodi koko hahán lokál ne’ebé te’in-na’in sira prepara.

Orsamentu ne’ebé Governu aloka ba feira ne’e hamutuk rihun $20.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here