Provedora Direitu ba Ema Nian no Justisa(PDHJ-sigla portugés), Jesuina Maria Ferreira Gomes. Imajen/Egas Cristovão

DILI, 27 agostu 2019 (TATOLI)-Provedoria Diretu Ema Nian no Justisa (PDHJ-sigla-Portugés) rekomenda ba Ministériu Interior (MI) no Komandu Polisia Nasionál Timor-Leste(PNTL), atu kontinua fó kapasitasaun membru Polisia sira iha área protesaun diretu umanu hodi serbí instituisaun ho profisionalizmu.

Notísia Relevante : PDHJ Simu Keixa 88 Kona-ba Mal Administrasaun

Provedora, Jesuina Maria Ferreira Gomes,   hato’o pedidu ne’e  bainhira halo lansamentu ba relatóriu  monitorizasaun no investigasaun trimestrál ba faze da-ruak  hahú Maiu to’o Jullu  hodi rejista kazu violasaun hasoru komunidade hamutuk 63.

“Relatóriu investigasaun konklui katak membru PNTL halo violasaun  ba direitu liberdade  seguransa no integridade hodi akontese tratamentu aat liu no la umanu,” hateten Provedora PDHJ, Jesuina Maria Ferreira Gomes, ohin, iha Edifísiu PDHJ, Caicoli, Dili.

Iha relatóriu ne’e, PDHJ husu ba Ministériu Interior interinu no Komandante Jerál PNTL atu foti sansaun disiplinár hasoru Komandante Polisia Munisípiu Manufahi ho ninia membru tanba tuir keixa ne’ebé komunidade hatama ba PDHJ iha loron 13 Jullu 2016 katak atuasaun la tuir lei.

Jesuina Maria Ferreira Gomes,  mós husu  ba Governu no Komandu PNTL atu kompleta mós ekipamentu servisu ba instituisaun PNTL.

Hatán ba kestaun ne’e, Inspektór  Xefe Polisia,  Carlos Jeronimo ne’ebé reprezenta komandante PNTL iha lansamentu relatóriu PDHJ nian ne’e rekoñese dala ruma membru Polisia sira halo atuasaun viola diretu ema tanba falta kontrolu.

Maibé nia promete sei esforsu nafatin hodi halo koordenasaun ho PDHJ nune’e bele halo prevensaun  ba violasaun diretu umanu.

“Ne’e atu hatete de’it kazu balun ne’ebé  aprezenta husi PDHJ, PNTL iha departamentu Justisa  hahú hala’o ona  prosesa hodi aprezenta ba Komandu Jerál PNTL hodi ita hotu hein rezultadu,” tenik Inspektór  Xefe Polisia, Carlos Jeronimo.

Jornalista: Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here