BOBONARO, 27 agostu 2019 (TATOLI) -Governu liuhusi Ministériu Reforma Lejizlativa no Asuntu Parlamenteres (MRLAP) kontinua halo konsultasaun públiku ba lei kostumeiru no justisa tradisionál ba dala tolu iha Postu Administrativu Atabae, Munisipiu Bobonaro, ho autoridade suku, lia na’in sira, Ofisial Polisia Suku (OPS) inklui mós estrutura administrativu.
Notísia Relevante : Lia Na’in Ermera-Liquiça Apresia Ho Atividade MRLAP
Asesór sósiu kulturál ba reforma lejizlativa MRLAP, Josh Trindade informa, konsulta públiku nee hetan partisipasaun másimu husi suku haat iha Postu Administrativu Atabae, hodi hatene kultura no tradisaun Kemak nian kona ba tesi lia.
“Konsulta públiku ida nee halo diskusaun kona ba prosesu tesi lia iha suku ida idak, kazu sira ne’ebé autoridade suku no lia na’in sira rezolve, direitu umanus lei kostumeiru, partisipasaun feto no sujestaun dalan ba oin,” esplika Josh Trindade ba Ajénsia TATOLI iha ámbitu konsultasaun lei públiku, iha Postu Administrativu Atabae, segunda (26/08/2019).
Tuir ajenda, ohin, MRLAP kontinua atividade konsulta públiku ne’e iha Maliana vila ho lian na’in sira husi lian Bunak, iha Marobo ho lian na’in sira husi lian Kemak, iha Lolotoe ho lia na’in sira husi lian Bunak no iha Suai Vila ho lian na’in sira husi Tetun Terik.
Konsulta públiku ida nee sei hala’o iha territóriu tomak, tuir lian ida idak nian mak MRLAP identifika iha lian 18 no total konsulta públiku ne’ebé MRLAP sei halo hamutuk dala-25.
Antes nee, halo ona konsulta públiku ho lian Mambae iha Ermera no lian Tokodede iha Liquiça.
Jornalista : Domingos Piedade Freitas
Editór : Francisco Simões
