Espoza matebian Sergio Vieira de Melo, Carroline Larriera. Foto: google

DILI, 27 Agustu 2019 (TATOLI)-Espoza matebian Sérgio Vieira de Melo (Eis-Administradór UNTAET), Carolina Larriera, ohin to’o iha Timor-Leste ho Aviaun City link, iha tuku 12:30, iha Aeroportu Nicolau Lobato, Dili.

Nia hateten, ida ne’e momentu espesiál ida ba nia hodi fila fali mai Timor-Leste depois nasaun ne’e realiza nia restaurasaun independénsia no Komemora Konsulta Populár ba dala 20.

“Ha’u sente orgullu bele fila mai hamutuk fali ho timoroan tomak, Timor-Leste nasaun ne’ebé bonita,” dehan Carolina Larriera ba jornalista sira hafoin to’o.

“Ha’u fiar katak Sérgio Vieira de Melo sempre hamutuk ho ita hotu no ho timoroan balun ne’ebé luta ba Timor-Leste, sempre akompaña no proteje ita hotu, iha nia mensajen ba ita maka, nia sempre hakarak ita hotu tenke iha forsa no unidade,” relembra Espoza Sergio Viera de Mello.

Nia hatutan, matebian brazileiru ne’e hamutuk ho timoroan sira ne’ebé mak mate ona ba Timór. “Sira hakarak tebes futuru ne’ebé di’ak no edukasaun ne’ebé di’ak ba nasaun ida ne’e. Nune’e mós, seguransa ne’ebé di’ak ba nasaun ne’e,” konsidera Carolina Larriera.

Vizita espoza matebian Sérgio Viera de Mello iha Timor-Leste agora ne’e ba dala haat, nune’e nia kompromete katak sei observa Timór inísiu husi Aeroportu Timor-Leste.

“Maske ha’u seidauk haree infraestrutura sira, maibé ohin ha’u haree foin sae barak, no ida ne’ebé halo ha’u orgullu tebes maka foin-sa’e sira ne’ebé maka luta no mate ba independénsia nasaun ida nee, sira komité tebes ba nasaun ida ne’e. Ha’u orgullu ho sira,” dehan Carolina.

Entretantu, Sérgio Viera de Mello ne’e diplomata Organizasaun Nasaun Unida (ONU) husi Brasil ne’ebé mak hala’o kna’ar diplomata nian durante tinan 34.

Nia moris iha Brasil iha loron 15 marsu 1948 no hakotu iis iha Bagdad, Irake iha loron 19 agostu 2003 ho tinan 55 hamutuk ho nia funsionáriu sira otél Canal (Irake) tanba esplozaun bomba, hafoin hala’o misaun nu’udar administradór tranzitóriu ONU nian iha Timor-Leste.

Notísia relevante:Tamrat Samuel Sente Kontente Bele Fila Fali Mai Timor-Leste

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here