Eis-Funsionáriu UNAMET Tamrat Samuel. Foto: Maldives

DILI, 26 agostu 2019 (TATOLI)-Eis-Pontu Fokál Sekretáriu Jerál, Organizasaun Nasaun Unida Ba Kestaun Timor-Leste, UNMISET (United Nation Transition Mission in East Timor), Tamrat Samuel segunda, ohin, to’o ona iha Timor-Leste ho Aviaun Citilink ho númeru QG7300, iha tuku 12: 20 otl (Oras Timor-Leste).

Eis-Pontu Fokál Sekretáriu Jerál, Tamrat Samuel, informa ba jornalista sira katak, sente kontente bele fila fali mai Timor-Leste, lembra fali memória sira iha tempu difisil, tempu di’ak, triste no kontente.

Nia mai ona Timór dezde 1993, istória naruk, maibé buat hotu-hotu, tuir nia, kontente haree Timor-Leste moris iha dame, iha governu demokrátiku uza sistema demokrátiku, dezenvolve no servisu ba nia dezenvolvimentu.

“Agora atu selebra depois tinan 20 nasaun atinji nia objetivu hosi nia sofrimentu sira,” hateten Eis-Funsionáriu UNAMET, Tamrat Samuel, ba jornalista sira iha Aeroportu Internasionál Prezidente Nicolau Lobato, Comoro, Dili, ohin.

Nia haktuir, iha progresu boot iha Timor-Leste kompara momentu ikus iha ne’e, 2012. “Hau agora kontente tebes atu haree tan no ha’u garante progresu barak ne’ebé hau lee ona no ha’u sei bele rasik testamuña no bainhira ha’u fila, ha’u sei ko’alia ba ita-boot sira (jornalista) iha konferensia imprensa,” nia kompromete.

Reprezentante Sekjer, Tamrat Samuel, kongratula povu Timor-Leste nia servisu eh esforsu ne’ebé atinji ona ba kuda dame.

“Iha dalan barak, Timor-leste ko’alia no rona ona ho sosiedade sira seluk ne’ebé de’it no nasaun barak.Timor-Leste bele hetan solusaun ba nia problema, bele harii sistema demokrasia, bele iha regulamentu no lei, mezmu ho problema saida de’it mak nasaun dezenvolvidu sira iha, maibé susesu iha tinan 20 ba kotuk mak mantein estabilidade, kontinuidade no sustenta funsaun  polítika ne’ebé dezeñadu”.

“Kongratulasaun bo’ot ne’e, ha’u hanoin serbisu bo’ot, ne’ebé tenke hala’’o maka kombate ki’ak no sai independente iha finál no sai na’in rasik ba asuntu eh problema rasik mak bele iha kombate ba hasoru,” nia esplika.

“No ida ne’e mak hanoin povu bele sente kompletamente liberdade hosi obstakulu, ne’ebé, hasoru iha tinan barak no sentraliza no ha’u hanoin ida ne’ebé mak tenke fokus kontinua fokus hosi governu no povu,” tenik eis-funsionáriu UNAMET.

Entretantu, Eis-funsionáriu UNAMET no reprezentante SEKJER, Tamat Samuel iha Dili, ohin, inklui funsionáriu UNAMET, Ilpo Mikkola no mós Ekipa solidariedade Fransa na’in tolu to’o ho aviaun Sriwijaya  hodi partisipa festa aniversáriu 30 agostu, Konsulta Populár.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here