Sekretáriu Estadu Formasaun Profisionál no Empregu, Julião da Silva. Imajen/Mídia SEFOPE.

DILI, 22 agostu 2019 (TATOLI)-Sekretáriu Estadu Formasaun Profisionál no Empregu (SEFOPE), Julião da Silva, husu ba estudante sira atu foti desizaun di’ak ba aban-bainrua tanba sira maka futuru nasaun nian.

SEFOPE hatete ida ne’e iha ámbitu espozisaun ne’ebé realiza iha Dom Bosco, Komoro, ohin, ne’ebé partisipa husi estudante hamutuk 8.377, mai husi eskola sekundária jerál no tékniku profisionál hamutuk 23 iha Dili.

“Espera iha espozisaun durante loron rua ne’e estudante sira bele hetan informasaun, matenek, no esperiénsia hosi oradór sira ne’ebé sei aprezenta nune’e hariku, haboot no habokur ita-nia matenek”, Julião da Silva afirma iha abertura espozisaun karreira profisionál iha salaun Dom Bosco, Komoro.

Tanba iha feira ne’e realiza mós semináriu ba estudante sira ne’ebé oradór sira mai hosi eis SEFOPE na’in-rua, Ilídio Ximenes da Costa, ne’ebé ko’alia kona-ba “Foin-sa’e mileniál iha empregu entre dezafiu ho oportunidade”, no eis SEFOPE Nívio Magalhães, ko’alia sobre “Formasaun profisionál dalan ba futuru juventude nian” no oradór seluk hosi Prezidente Autoridade Nasionál Petróleu no Minerál (ANPM), Gualdino da Silva, hodi ko’alia kona-ba “Perspetiva serbisu iha indústria petrolífera”.

No mós hosi eis Prezidente Repúblika, José Ramos Horta, ne’ebé sei ko’alia kona-ba “Poténsia foin-sa’e Timor-Leste prepara ba iklima empregu globál”.

Governante ne’e salienta Estadu Timor-Leste hanesan nasaun ida sei joven tebes, tanba ne’e foin-sa’e sira presiza dezenvolve aan para bele partisipa direta iha prosesu konstrusaun Estadu.

“Nasaun Timor-Leste ita mak na’in, se hakarak atu sai na’in loloos ita tenke kontribui hodi partisipa iha prosesu dezenvolvimentu”, Julião enkoraja.

Líder másimu SEFOPE ne’e agradese ba partisipasaun estudante sira nian iha atividade ne’e no hodi hetan informasaun foun hodi deside ba sira-nia futuru.

Hafoin lansamentu ba espozisaun ne’e, Sekretáriu Estadu hamutuk ho partisipante sira vizita feira ne’ebé prepara.

Partisipa iha espozisaun ne’e mai hosi reprezentante Kámara Komérsiu Indústria Timor-Leste (CCI-TL, sigla portugés), Institutu Petróleu no Jeolojia, Autoridade Nasionál Petróleu no Minerál (ANPM), sentru treinamentu sira no seluk tan.

Notísia relevante : Espozisaun Karreira Profisionál Iha Dom Bosco Komoro Partisipa Husi Eskola 23 iha Dili

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here