SEFOPE, Julião da Silva, hamutuk ho partisipante tesi fita hodi halo abertura ba espozisaun karreira profisionál ba estudante sira ne’ebé realiza iha salaun Dom Bosco, Komoro, Kinta (22/9/2019). Imajen/Antónia Maia Gusmão.

DILI, 22 agostu 2019 (TATOLI)-Sekretáriu Estadu Formasaun Profisionál no Empregu (SEFOPE) realiza espozisaun karreira profisionál iha Dom Bosco, Komoro, ohin, ne’ebé partisipa husi estudante hamutuk 8.377 ne’ebé mai husi eskola sekundária jerál no tékniku profisionál hamutuk 23 iha Dili.

Espozisaun ne’e loke husi SEFOPE, Julião da Silva, no sei hala’o durante loron rua hodi realiza mós semináriu ba estudante sira.

Ba loron dahuluk, oradór sira kompostu hosi eis SEFOPE na’in-rua, Ilídio Ximenes da Costa, ne’ebé ko’alia kona-ba “Foin-sa’e mileniál iha empregu entre dezafiu ho oportunidade”, no eis SEFOPE Nívio Magalhães, ko’alia sobre “Formasaun profisionál dalan ba futuru juventude nian” no oradór seluk hosi Prezidente Autoridade Nasionál Petróleu no Minerál (ANPM), Gualdino da Silva, hodi ko’alia kona-ba “Perspetiva serbisu iha indústria petrolífera”.

Iha aban, oradór mai hosi eis Prezidente Repúblika, José Ramos Horta, ne’ebé sei ko’alia kona-ba “Poténsia foin-sa’e Timor-Leste prepara ba iklima empregu globál”.

Prezidente Komisaun Organizadora, Lúcio Beretaci, hatete objetivu husi espozisaun karreira profisionál ba estudante sira maka atu lori sira, liuliu estudante ne’ebé besik remata ona ensinu sekundáriu atubele haree feira sira ne’ebé prepara hosi sentru formasaun no mós instituisaun Estadu no universitáriu sira nune’e eskola remata bele deside sira-nia futuru.

“Tinan ida ne’e la marka prezensa hosi PNTL no F-FDTL tanba okupadu ba preparasaun aniversáriu konsulta populár, maski ami haruka ona karta konvite. Instituisaun rua ne’e importante tanba estudante sira remata eskola sekundária hakarak deside mós atu sai membru ba instituisaun Estadu rua ne’e nian”, Lúcio Beretaci afirma bainhira hato’o relatóriu espozisaun ne’e iha salaun Dom Bosco, Komoro.

Nia hatutan espozisaun ne’e tinan-tinan realiza, maibé iha tinan 2017-2018 la halo tanba kestaun orsamentu.

Iha partisipasaun estudante sira iha eventu ne’e, kada ema ida sei simu $1 no orsamentu ba espozisaun ne’e hamutuk rihun $20-resin ne’ebé mai hosi Orsamentu Jerál Estadu 2019.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here