Arguido sira hein iha sela atu partisipa audensia julgamentu iha TDD, Segunda (22/07/2019). Imajen/Domingos Piedade Freitas

DILI, 22 jullu 2019 (TATOLI) – Tribunál Distritál Dili (TDD), ohin, kontinua halo audiénsia julgamentu ba kazu omisídiu ne’ebé oho vitima Vera  Carvalho Martins.

Liuhusi kontinuasaun julgamentu nee, tribunál  aprezenta Espesialista Forensik, Anisley Santos, husi Ospitál Nasionál Guido Valadares (HNGV-sigla portugés) hodi fó sai rezultadu autópsia ba vítima ne’ebé deskonfia oho husi nia namoradu rasik.

Tuir deklarasaun hosi pesoál médiku nee ba tribunal katak, loos duni hosi rezultadu autópsia ba vítima Vera nia mate isin, hetan kanek ne’ebé taa ho sasán kro’at.

“Husi ami nia rezultadu autópsia ba vítima nia mate isin hetan kanek iha isin lolon ne’ebé deskonfia vítima mate tanba hetan oho hosi sasán kro’at,” deklara espesialista forensik ne’e.

Matebian Vera Carvalho Martins, nu’udar  Estudante Departamentu Matemátika, Universidade Nasionál Timor Lorosa’e (UNTL) nia isin mate bainhira lori ba HNGV la kompletu ona tanba isin lolon balun asu dada hotu ona.

“Kona ba kanek hosi ain liman nee la hatene klaru, tanba momentu ne’ebá vítima nia ain liman asu dada sai tiha ona. So apenás hatene de’it taa hosi ulun no sona hosi kotuk klaran,” sasin ne’e deklara.

Rona tiha deklarasaun nee, tribunal husu atu buka no konfirma tuir vítima nia identidade loloos iha diresaun rejistu notariadu no STAE.

“Ba kazu nee atu hatene vítima nia identidade loloos, mak tribunal sei konfirma hosi STAE no diresaun Notariadu, nune’e hatene katak ema ho naran Vera de Carvalho Martins rejistadu ka lae,” tribunal deklara.

Audiénsia julgamentu ne’e ne’ebé prezide husi Juis koletiva Juis Eugevio Xavier, Ana Paula, Zulmira Auxliadora, ne’e adia hikas ba loron seluk hodi kontinua rona sasin balu ne’ebé tribunál seidauk  rona.

Iha Sesta (19/07/2019), Tribunál, Ministériu Públiku no arguido sira nia defeza, halo ona inspesaun lokál ba fatin akontesimentu iha area Kristu Rei ho  fatin soe vítima Vera nia isin mate iha Subaun.

Reprezentante Ministériu Públiku, Prokuradór Antonio Tavares da Silva, hatete, hosi inspesaun nee nota mós buat balu ne’ebé Ministériu Públiku presiza atu konfirma liután ba sasin hosi parte vítima nian.

“Ita halo duni inspesaun ba fatin rua, primeiru iha area Kristu Rei no ba liu iha area Subaun no iha ne’ebá mosu dúvida balu ne’ebé presiza konfirma liután ba sasin hosi vítima sira nian,” informa Prokuradór  Antonio Tavares da Silva.

Enkuantu, iha audiénsia antes mós tribunál rona sasin balu ne’ebé notifika hosi parte Ministériu Públiku nian ho inisiál AS.

Kazu ho kategoria omisídiu ne’e envolve arguido na’in haat, kompostu husi arguido  arguido NX NSB, ADJ no JT.

Ba prosesu julgamentu ne’e, arguido sira hetan asisténsia legal hosi advogadu privadu na’in lima hosi konsultóriu advokasia Lafaek, hanesan advogadu Agostinho de Jesus, Miguel Faria, Ismael, Virna Lorença ho Adelina Lobo.

Notísia Relevante : Kazu Oho Vera, MP Sujere Halo Inspesaun Lokál

Jornalista          : Domingos Piedade Freitas

Editór                : Francisco Simões

HAKEREK NO HATÁN

Please enter your comment!
Please enter your name here