Prezidente Komisaun Organizadora ba Selebrasaun Aniversáriu Loron Konsulta Populár ba dala-20, Kay Rala Xanana Gusmão ho Diretór ADN, Samuel Marçal, observa direita konstrusaun Jardín B.J. Habibie iha Lesidere Dili. Imajen/Eugénio Pereira

DILI, 07 agostu 2019 (TATOLI)- Kompañia Bhakti Karya Timor-Leste (BTK)  komprometidu sei finaliza projetu konstrusaun jardín B.J. Habibie, Bidau, Dili, iha loron 25 agostu, tinan  ne’e.

Prosesu konstrusaun ba projetu Jardín Ponte Bidau Lesidere Dili ne’ebé sei tau naran Eis Prezidente Replika Indonézia, B.J.Habibie sei finaliza iha loron 25 Agostu agora. Imajen/Eugénio Pereira

Prezidente Komisaun Organizadora ba Selebrasaun Aniversáriu loron Konsulta Populár ba dala-20 (30 agostu 1999-30 agostu 2019), Kay Rala Xanana Gusmão, ohin, halo inspesaun direita ba haree evolusaun servisu konstrusaun Ponte ho Jardín B.J. Habibie nian hodi husu ba Diretór Kompañia BTK, Frans Holiwono atu organiza ekipa servisu ho lalais atu bele inaugura iha loron loron 30 agostu ne’e.

“Ponte Bidau, ami halo remata ona, no agora prosesu konstrusaun jardín  sei kontinua halo  too loron 25 agostu, ami finaliza hodi entrega  ba Governu,” hateten Frans ba Xanana Gusmão ho Diretór Ajénsia Dezenvolvimentu Nasionál, Samuel Marçal durante hala’o observasaun konstrusaun Jardín Ponte  B.J. Habibie.

Iha inspesaun ne’e, Xanana haree direita ekipa tékniku sira hahú kuda ona duut, no ai-oan, monta lampu no komesa pinta ona  no monta lampu hodi hafurak jardín no ponte B.J. Habibie.

Diretór ADN, Samuel Marçal esplika, projetu ne’e halo tuir pedidu hosi Ministériu Planeamentu no Investimentu Estratéjiku (MPIE) koordena  ho Ministériu Obra Publika  ne’ebé tuir planu sei inaugura hosi Prezidente Repúblika Indonézia, Joko Widodo.

Projetu Konstrusaun ponte ne’e ho númeru kontratu S55/122/MOPTC,2017 ho durasaun hahú 31 agostu 2017 too 31 agostu 2019 ho kustu $3,963.319,62.

Konstrusaun ba Fatin Serimónia

Iha parte seluk, Samuel esplika prosesu konstrusaun ba fatin serimónia festa Konsulta Populár iha Tasi Tolu  mós komesa halo daudaun ona too ona porsentu 35 ba leten ne’ebé implementa hosi komunidade, autoridade ho joven Suku Comoro nian.

Nia dehan, prosesu instalasaun ba eletrisidade, hariis fatin ba bainaka importante VIP no rede hale’u ba fatin serimónia halo remata ona, hein de’it, monta tan hena inklui kadeira ba tuur fatin no ekipamentu seluk tan ne’ebé sei instala iha fatin serimónia.

Diretór ADN, Samuel Marçal, garante bainhira festa hahú preparasaun hotu-hotu sei too porsentu 100, tanba agora daudaun Prezidente Komisaun Organizadora Xanana Gusmão, kontinua vizita no haree diretamente fatin serimónia sira inklui Jardín Motaél nian sei kuda ai oan ba dame nian ne’ebé prepara husi Ministériu Agrikultura no Peska.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here