Labarik sira. Imajen/António Gonçalves

DILI, 21 agostu 2019 (TATOLI)-Diresaun Nasionál Rejistu no Notariadu husi Ministériu Justisa ho nia parseiru World Vision Timor-Leste halo ona rejistu  ba labarik ho tinan 0-5 hamutuk  368 hodi hetan sertidaun moris RDTL iha Suku Gariuai, Postu Administrativu Baucau Munisípiu Baucau.

Notísia Relevante Semana Oin, DNRN-World Vision Hahú Rejistu Labarik

Programa rejistu ba labarik ne’e hala’o durante loron rua, hahú husi loron 19-20 agostu 2019.

Diretór Jerál Servisu Rejistu no Notariadu, Crisogno da Costa Neto,  informa, hafoin termina rejistu iha suku Gariuai, ekipa tékniku kompostu husi  ema na’in sia (9), kontinua hala’o rejistu hanesan ba labarik sira  iha Suku Buibau, Postu Administrativu Baucau Vila,  Munisípiu Baucau, durante loron 21-22 agostu.

“Komunidade sira entuziazmu  hodi lori sira nia oan ba rejistu tanba ne’e ekipa servisu to’o fali tuku 08:00 kalan Otl,”informa Diretór Jerál ne’e, ohin, via telefone  ba Ajénsia TATOLI.

Notísia Relevante MJ-World Vision Asina Akordu Rejista Labarik

Nia esplika, hafoin termina iha Suku Buibau, tuir oráriu ekipa DNRN  ho  World Vision Timor-Leste ne’e sei kontinua halo rejistu  ba labarik sira iha Suku Samalari, Suku Uailili no  Suku Tirilolo, Munisípiu Baucau.

“Depois ita konklui iha Munisípiu Baucau, ita sei kontinua halo rejistu ba labarik sira iha Munisípiu Aileu,” informa Crisogno da Costa Neto.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here